धरानमा सद्भाव कायम गराउन राजनीतिक दल र जनप्रतिनिधिहरू एक ठाउँमा

८ भदौ, काठमाडौं । केही दिनपहिले सुनसरीको धरानमा भएको भनिएको गोरु काटिएको घटनापछि धरानमा उत्पन्न सदभाव खल्बल्याउने किमिसमका गतिविधि रोक्न स्थानीय तह, राजनीतिक दल तथा अभियन्ताहरु सदभाव कायम गर्ने काममा लागेका छन् । 

शुक्रकार धरान उपमहानगरपालिकाका मेयर हर्क साम्पाङले एक प्रेस विज्ञप्ति निकाले एकाध घटनालाई लिएर सामाजिक संजालमा समाजिक सद्भाव र सहिष्णुता खलबल्याउने किसिमका गतिविधि र व्यवहार भइरहेको भन्दै त्यस्ता क्रियाकलाप रोक्न अपिल गरेका छन् । उनले धरान धार्मिक, सांस्कृतिक भौगोलिक विविधता भएको शहर भएको र यसका संरक्षणमा सबै जाति, समुदाय र धर्मालम्बीहरु एकतावद्ध रहेको बताए । 

सामाजिक शान्ति कायम गराउन उनले सबैसँग आग्रह गरेका छन् । विरोध र प्रतिशोध बढाउने कुनै खालका प्रचार र गतिविधि नगर्न विशेष अनुरोध हामी नेपाली सयौं फूलका एउटै माला भएको यथार्थ स्मरण गर्न समेत अपिल गरेका छन् । 

बिहीबार मात्र पूर्वजनप्रतिनिधिहरुले संयुक्त अपिल जारी गर्दै धरानमा सद्भाव कायम गर्नुपर्नेमा जोड दिएका छन् । पूर्वमेयर तथा नागरिक अगुवा कुमारबहादुर कार्कीको पहलमा निवर्तमान मेयर तिलक राई, पूर्वमेयर कुमारबहादुर कार्की, पूर्वमेयर मनोजकुमार मेन्याङबो र पूर्वउपमेयर मीनकुमार सुब्बाले संयुक्त अपिल निकालेर एकाध घटनालाई विषय बनाएर समाजमा शान्ति बिथोल्ने काम नगर्न सबैसँग अपिल गरेका थिए । वार्ता र छलफलमा समस्याको समाधान गर्न सकिने बताएका थिए । 

सदभावका लागि धरानमा शुक्रबार दिउँसो २ बजे शान्ति र्यालीको अयोजना गरिएको छ । बिहान सर्वदलीय बैठक समेत बसेको छ । बैठकले शान्ति र्यालीमा सबै समूदायका नागरिकलाई सहभागी हुन अपिल गरेको छ ।