धरानमा आपसी सदभाव कायम राख्न सर्वदलीय अपिल

८ भदौ, विराटनगर । संभावित दुर्घटनालाई लिएर धरानका सबै राजनीतिक दलहरूले सद्‌भावको अपिल गरेका छन् । संयुक्त वक्तव्य जारी गर्दै दलहरूले सम्भावित दुघर्टना रोक्न शनिबार धरानमा तय गरिएका सबै कार्यक्रम स्थगित गर्न आग्रह गरेका छन् ।

परिस्थितिको गाम्भीर्यतालाई मनन गर्दै सामाजिक सञ्जाल लगायतबाट सामाजिक सदभाव खल्बलिने सामग्रीहरू पोष्ट, शेयर तथा कमेन्ट नगरिदिन सबैमा अपिल गरिएको छ । वक्तव्यमा भनिएको छ, ‘अतः भोलि भाद्र ९ गते सम्बन्धित पक्षहरुबाट धरानमा आयोजना गर्न लागिएका पुर्वनिर्धारित कार्यक्रमहरू स्थगित गरी वातावरण सहज बनाउन भुमिका निर्वाह गरिदिन हुन हार्दिक अनुरोध छ ।’

दलहरूले सामाजिक द्वोष तथा आस्था भावनामा ठेस पुर्याउने गतिविधि नगरिदिन आग्रहसमेत गरेका छन् । धरानमा देखा परेको धार्मिक तथा सांस्कृतिक विवाद वार्ताको माध्यमबाट हल गर्न पहलकदमी लिने दलहरूले प्रतिबद्धता समेत जनाएका छन् । धार्मिक द्वन्द्वको खतरा बढेर गएपछि स्थानीय प्रशासनले धरानमा निषेधाज्ञा जारी गरेको छ भने जनप्रतिनिधिहरूले संयमता अपनाउन सर्वसाधारणमा अपिल गरेका छन् । 

यस्तै जिल्ला प्रशासन कार्यालय सुनसरीले धरान उपमहानगरपालिका क्षेत्रभित्र निषेधाज्ञा जारी गरेको छ । धार्मिक-साम्प्रदायिक, जनस्वास्थ्य संकट तथा शान्ति सुरक्षाको संवेदनशीलतालाई समेत मध्यनजर राखी संक्रामक रोग ऐन २०२० को दफा (२) तथा स्थानीय प्रशासन ऐन, २०२८ को दफा ६ को उपदफा (३) बमोजिम शुक्रबार राति १२ बजेदेखि शनिबार राति १२ बजेसम्म निषेधाज्ञा जारी गरेको हो ।

प्रमुख जिल्ला अधिकारी हुमकला पाण्डेले शुक्रबार सूचना जारी गर्दै धरान उपमहागनर क्षेत्रभित्रका सबै वडाहरूमा सामाजिक, धार्मिक, राजनीतिक सभा, भेला र प्रदर्शन नगर्न आग्रह गरेका हुन् । तर अत्यावश्यक काम भने सुरक्षा निकायसँगको समन्वयमा गर्न सकिने सूचनामा उल्लेख छ ।

निषेधाज्ञा धरान उपमहानगरपालिका प्रवेश गर्ने पश्चिम बाटो बराहक्षेत्र नगरपालिका–१ मा पर्ने झन्डा चोकदेखि धरान तर्फको क्षेत्र, पश्चिम दक्षिण रामधुनी नगरपालिका–६ बाट बराहक्षेत्र नपा–३ नडाहा चोकबाट धरान तर्फको क्षेत्रमा लागू हुनेछ । त्यस्तै इटहरी उपमहानगरपालिका–२० तरहरा पानीपियादेखि उत्तर धरानतर्फको क्षेत्र र धरान उपमहानगरपालिका–५ प्रवेश गर्ने पूर्वी केराबारीबाट धरान तर्फको क्षेत्र तथा धनकुटा जिल्ला साँगुरीगढी गाउँपालिका–६ भेडेटारबाट धरान तर्फको क्षेत्रमा निषेधाज्ञा जारी गरिएको छ ।