लक्ष्मी सनराइज बैंकको खराब कर्जा ३ गुणाले बढ्यो, बेसरेट बढ्दा कर्जा लिएकाको ब्याज भयो महँगो

१० भदौ, काठमाडौं । हालै बिग मर्ज गरेको लक्ष्मी सनराइज बैंकको खराब कर्जा डरलाग्दो हिसाबले वृद्धि भएको छ । अघिल्लो आर्थिक वर्षमा  शुन्य दशमलव ८९ प्रतिशत रहेको खराब कर्जा गत आर्थिक वर्षको चौथो त्रैमाससम्म २ दशमलव ८१ प्रतिशत पुगेको छ । बिग मर्जरको साइड इफेक्ट यस बैंकको वित्तीय प्रतिवेदनमा देखिने निश्चित जस्तै छ । 

बैंकको बेसरेट महँगो भएको छ ।  अघिल्लो वर्ष ९ दशमलव ९९ प्रतिशत रहेको बेसरेट गत आर्थिक वर्षको चौथो त्रैमासमा १० दशमलव ७५ प्रतिशत पुगेको छ । यसले गर्दा बैंकबाट ऋण लिएकालाई समस्या परेको छ । कर्जाको ब्याज महँगो भएको छ । 

बैंक संचालक समितिको अध्यक्षमा रमण नेपाल रहेका छन् । बैंकको संचालक समितिका अन्य सदस्यमा बच्छराज तातेड, मालचन्द दुगड, मनिष थापा, स्वाती रुङ्गटा र स्वतन्त्र संचालकमा विद्या बस्न्यात रहेका छन् । 

त्यस्तै बैंकको उच्च व्यवस्थापनमा सीईओ अजय विक्रम शाहदेखि वरिष्ठ डेपुटी सीईओमा शुमेड भट्टराई रहेका छन् । कस्तो आयो आर्थिक वर्ष २०७९-८० को चौथो त्रैमासको वित्तीय प्रतिवेदनः

खुद मुनाफाः
गत आर्थिक वर्षको चौथो त्रैमास अर्थात् १२ महिनाको अवधिमा बैंकले २ अर्ब २६ करोड बराबर खुद मुनाफा गरेकोमा अघिल्लो आर्थिक वर्षको चौथो त्रैमाससम्ममा यो बैंकले १ अर्ब ५१ करोड बराबर खुद मुनाफा गरेको थियो । यसरी खुद मुनाफामा ४९ दशमलव  ४५ प्रतिशतको वृद्धि भएको छ ।

खुद ब्याज आम्दानी र संचालन मुनाफाः
अघिल्लो आर्थिक वर्षको चौथो त्रैमासमा कम्पनीले ३ अर्ब ७६ करोड बराबर खुद ब्याज आम्दानी गरेकोमा गत आर्थिक वर्षको चौथो त्रैमाससम्म कम्पनीले ५ अर्ब ५० करोड खुद ब्याज आम्दानी गरेको छ । यसरी खुद ब्याज आम्दानीमा ४६ दशमलव  ४५ प्रतिशतको वृद्धि भएको छ । त्यस्तै, संचालन मुनाफा ५८ दशमलव  ८९ प्रतिशतले वृद्धि हुँदै ३ अर्ब ४२ करोड पुगेको छ । अघिल्लो वर्षको चौथो त्रैमासमा कम्पनीले २ अर्ब १५ करोड संचालन मुनाफा गरेको थियो ।

वितरणयोग्य मुनाफा:
कम्पनीको वितरणयोग्य मुनाफा १ अर्ब ९३ करोड रहेको छ । अघिल्लो आर्थिक वर्ष वितरणयोग्य मुनाफा १ अर्ब २० करोड थियो । समीक्षा अवधिमा वितरणयोग्य मुनाफा ६१ दशमलव  ३२ प्रतिशतले  बढेको छ । कम्पनीको प्रतिशेयर वितरण योग्य मुनाफा ८ रूपैयाँ ९४ पैसा रहेको छ । अघिल्लो आर्थिक वर्ष प्रतिशेयर वितरणयोग्य मुनाफा १० रूपैयाँ ४० पैसा थियो ।

निक्षेप, कर्जाः
कम्पनीले गत आर्थिक वर्षको चौथो त्रैमाससम्म २ खर्ब ९६ अर्ब निक्षेप संकलन गरी २ खर्ब ५३ अर्ब कर्जा प्रवाह गरेको छ । आर्थिक वर्ष २०७८-७९ को असार मसान्त र अहिलेको तथ्याङ्कलाई दाँजेर हेर्दा कम्पनीको निक्षेप संकलन ११२ दशमलव  ३० प्रतिशतले वृद्धि भएको छ भने कर्जा प्रवाह पनि १०० दशमलव  १३ प्रतिशतले वृद्धि भएको छ ।

जगेडा कोष, संचित मुनाफाः
जगेडा कोष २३४ दशमलव २३ प्रतिशतले बढ्दै १४ अर्ब ५ लाख पुगेको छ भने संचित मुनाफा १ अर्ब ९३ करोड  रुपैयाँ पुगेको छ ।

किताबी मूल्य कति ?
कम्पनीको किताबी मूल्य (प्रतिशेयर नेट्वर्थ) १७३ रूपैयाँ ५५ पैसा आउँछ ।

निष्क्रिय कर्जाः
कम्पनीको खराब कर्जा २ दशमलव ८१ प्रतिशत रहेको छ । अघिल्लो आर्थिक वर्षको चौथो त्रैमासमा खराब कर्जा शून्य दशमलव ८९ प्रतिशत थियो ।

आधार ब्याजदर, स्प्रेडदरः
बैंकको आधार ब्याजदर केही बढ्दै १० दशमलव  ७५ प्रतिशत पुगेको छ । स्प्रेडदर ४ दशमलव  ४२ प्रतिशत छ । अघिल्लो आर्थिक वर्ष सोही अवधिमा स्प्रेडदर ३ दशमलव  ९४ प्रतिशत थियो ।