सर्वोच्च अदालतमा स्वचालित पेसी तारेख प्रणाली प्रारम्भ

११ भदौ, काठमाडौं । सर्वोच्च अदालतमा सोमबारबाट पेसी तारिख अटोमेसन सुरु भएको छ । अटोमेसन प्रविधिबाट पेसी तारेख तोक्ने कामको सुरुवात प्रधानन्यायाधीश विश्वम्भरप्रसाद श्रेष्ठले गरेका हुन् । 

पेसी तारेख अटोमेसनको शुभारम्भपछि प्रधान्यायाधीश श्रेष्ठले न्यायालयमा सुशासनका काम सुरु भएको बताए । यसबाट न्यायिक सुशासन र न्याय सम्पदानमा महत्वपूर्ण कदम भएको उनले बताए । 

मुद्दाको पेसी तोक्ने र हटाउने वा सार्ने काममा कर्मचारीको तजबिजी चल्ने र कतिपय पेसीमा लेनदेन समेत हुने गुनासो सेवाग्राहीबाट व्यापक आउन थालेपछि न्यायिक सुधारका लागि अटोमेसन अर्थात स्वचालित विधिबाट पेसी तारेख तोक्ने कामको सुरुवात गरिएको प्रन्या श्रेष्ठले बताए । नयाँ प्रविधिको प्रयोगसँगै कम जनशक्तिले धेरै काम गर्न सकिने उनले बताए । अटोमेसन सफ्टवेयर सर्वोच्चको आफ्नो जनशक्तिबाटै निर्माण भएको हो ।

सेवाग्राहीले ल्याएको रिट निवेदन÷पुनरावेदन निवेदनसहितका मुद्दामा दर्तासँगै स्वतः पेसी र तारिखको मिति पाउने व्यवस्था नयाँ प्रणालीबाट पाउने भएका छन् ।