सानाे ठिमीकाे सुधार गृहबाट भागेका ५ कैदीबन्दी अझै भेटिएनन्

११ भदौ, काठमाडौं । भक्तपुर सानो ठिमीस्थित बाल सुधार गृहबाट भागेका मध्ये ५ कैदीबन्दी पक्राउ पर्न सकेका छैनन् । यही भदौ ३ मा सुधार गृहमा रहेका रामेछाप मन्थली नगरपालिका–३ का कमल बस्नेतको उपचारका क्रममा मृत्यु भएको घटनालाई लिएर भएको मृतकका आफन्तले भोलिपल्ट गरेका प्रदर्शनका क्रममा मूल ढोका फोडेर फरार भएका २२१ कैदीमध्ये ५ जना अझै फरार रहेका छन् । 

फरार रहेका कैदीहरुको नाम प्रहरीले खुलाएको छैन । बाँकीलाई काठमाडौं र ललितपुरबाट सोही दिन र भोलिपल्ट पक्राउ गरिएको थियो । 

यसैबीच मृतक कमलको शव परिवारका सदस्यले आज बुझेका छन् । क्षतिपूर्ति र सुधार गृहमा राखिएका झण्डै ३०० कैदीलाई समयमा औषधोउपचार, रासनमा एकरुपता, सुरक्षित भवना निर्माण गर्ने लगायत विषयमा प्रशासन र परिवारका सदस्यबीच सहमतिपछि शव बुझेका हुन् ।