६० किलो सुन तस्करीको अनुसन्धानमा सीआईबीले अधिकृतको नेतृत्वमा टोली भारत पठाउने

१४ भदौ, काठमाडौं । नेपाल प्रहरीको केन्द्रीय अनुसन्धान ब्यूरो (सीआईबी)ले ६० केजी सुन तस्करी प्रकरणको अनुसन्धान गर्न एक अधिकृतको टोली भारत पठाउने भएको छ । बिहीबार नै अनुसन्धान अधिकृतलाई टोलीसहित भारत पठाउने तयारी भइरहेको छ । 

यसअघि मंगलबार मात्र सीआईबीले कार्यालयका एसएसपी दिनेश आचार्यलाई प्रकरणको अनुसन्धानका लागि हङकङ पठाइसकिएको छ । तस्करीमा तस्करको अन्तरदेशीय संजाल नै सक्रिय रहेको सुइको पाइएपछि सीआईबीले नेपाल उडान भर्ने ट्रान्जिट मुलुकहरुसँग समन्वय गरेर तस्करीको जरोसम्म पुग्ने कोशिस गरेको छ । 
तस्कर गिरोहका नाइकेसम्म पुगेर तिनलाई इन्टरपोलमार्फत खोजी गर्ने वातावरण बनाउने योजनाअनुरुप सीआईबीले नेपालको हवाइ ट्रान्जिट प्वाइन्ट रहेका मुलुकमा पुगेर अनुसन्धानलाई फराकिलो बनाउँदै लगेको छ । 

हङकङ पठाइएका टोली नेतृत्वको नाम सार्वजनिक गरेपनि भारततर्फका भने केही खुलाइएको छैन ।

प्रकरणमा नेपालबाट पक्राउ परेको चिनियाँ ७ जनामध्ये केही अभियुक्त यसअघि भारतमा ठूलो मात्रामा सुन तस्करीमा संलग्नताको आरोपमा लामो समय जेल बसेर छुटेकाे पाइएको छ । 

गएको साउन २ हङकङबाट काठमाडौं आएको विमानबाट मोटरसाइकलको दर्जनौं संख्यामा ब्रेकशुमा लुकाएर ल्याएको सुन त्रिभुवन अन्तर्राष्ट्रिय विमानस्थलबाट उम्काइएपनि भन्सार विभागले सिनामंगलबाट नियन्त्रणमा लिएको थियो । पछि उक्त ब्रेक-शु नेपाल राष्ट्र बैंकको तक्सर विभागले सुरक्षाकर्मीको रोहबरमा पगालेर तौल लिँदा ६० केजी ७१६ ग्राम सुन ठहरिएको थियो । उक्त परिमाणको सुन ‘रेडी ट्रेड प्रालि’ले मगाएको ब्रेक-शुमा भेटिएको हो । 

गत पुष १० मा तस्करले विद्युतीय चुराे (भेप)काे रूप बनाएर ९ केजी सुन तस्करी गरेकाे पाइएकाे सीआईबीकाे प्रतिवेदनले पहिल्यै जनाइसकेकाे छ । जुन प्रकरणमा हिजाे मात्र पूर्वसभामुख कृष्णबहादुर महरा पुत्र राहल सीआईबीले पक्राउ गरिसेकेकाे छ ।

सोही प्रकरणमा भन्सार विभाग र पछि सीआईबीको टोलीले गरी ७ चिनियाँसहित २४ जनालाई पक्राउ गरिसकेको छ । पाल्पाका एक जना गणेश पौडेललाई बुधबार मात्र पक्राउ गरेको थियो । नेपालमा हवाई मार्ग भएर हङकङ र दुबईबाट सुन तस्करी हुने गरेको पाइएको छ । खाडीमा मजदुरी गरेर फर्किएकाहरूबाट तस्करले बाेकाएर पठाइएका सानाे परिमाणकाे सुन मात्र विमानस्थलमा दैनिक ३५ केजीसम्म बराम हुने गरेकाे विमानस्थल स्राेतले जनाएकाे छ । 

कामदारले घाँटी लगाएका सिक्री, हातका औंठी, चुरा समेत नियन्त्रणमा लिन थालिएकाे गुनासाे कामदारहरूले गरेका छन्  । जब कि काँचाे सुन ५० ग्रामसम्म कामदारले ल्याउन पाउने छुट कानूनले दिएकाे उनीहरूकाे भनाइ छ । भिजिट भिसामा विदेश घुमेर फर्किएका सुजाता गिरीकाे ३ ताेलाकाे सिक्रीकाे भन्सार तिराएकाे विषयकाे संसदमा समेत विराेध भएकाे थियाे ।

विभिन्न वस्तुमा सुनको राखेर लुकाईछिपाई तस्करी भइरहेको पाइएपछि अहिले विमानस्थलका चेकजाँच कडाइ गरिएको छ । पक्राउ परेका केही अभियुक्तसमेतकाे संलग्नतामा खाेलिएकाे रेडी ट्रेड प्रालिको नाममा यस्तै प्रकारका कार्गो यसअघि ३५ पटक भित्रिएको पाइएको सीआईबीको दाबी छ । त्यसमाथि पनि अनुसन्धान केन्द्रित गरिएको छ । 

ठूलो परिमाणमा तस्करीका सुन बरामद भएपछि विमास्थल भन्सारमा ’माथिकाे‘ निर्देशनमा चेकजाँचमा कडाइ गरिएपछि ‘तानव भएको’ बताएर विमानस्थल भन्सारका ३५ अधिकृतसहित १३५ कर्मचारीले कर्मचारीले बुधबार मात्र हाकिमलाई निवेदन लेखेर सामूहिक सरुवाको माग गरेका छन् ।