ठूला ग्राहकसँग हाकाहाकी घुस माग्ने विद्युत प्राधिकरणका हाकिम

१५ भदौ, रोल्पा । नेपाल विद्युत प्राधिकरण रोल्पा वितरण केन्द्रका प्रमुख अशेश्वर साह ठूला ग्राहकहरूसँग हाकाहाकी घुस माग्ने गरेको उद्योगपति एवं व्यवसायीहरूले आरोप लगाएका छन् । नेपाल विद्युत प्राधिकरण हेटौंडा शाखामा कार्यरत रहँदा सेवाग्राहीलाई अनेक बहानामा दुख दिने, नजराना माग्ने गरेको गुनासो सेवाग्राहीले निरन्तर गरेपछि प्राधिकरण केन्द्रले रोल्पामा सरुवा गरेको थियो ।

हेटौंडामा कार्यरत रहेकै बेला उनी उद्योगीहरुसँग नजराना असुल गरि मोज मस्ती गर्न भारतको पर्यटकीय क्षेत्र गोवा गएका थिए । भ्रष्टाचार गरि अकुत सम्पत्ति आर्जन गर्न पल्किएका साह रोल्पामा सरुवा भएर आएदेखि लिवाङमा पनि स्थानीय सेवाग्राहीलाई दुख दिने गरेका छन् । 

विद्युत प्राधिकरणको नेतृत्वमा इमानदार कुलमान घिसिङ रहेपनि उनैको नाकमुनी नेपाल विद्युत प्राधिकरण रोल्पा वितरण केन्द्रका प्रमुख अशेश्वर साह भ्रष्टाचार गर्न पल्किएका छन् । जहाँ सरुवा भएर गयो त्यही आफ्नो रवाफ देखाउँदै सेवाग्राहीहरुसँग दुर्व्यवहार गर्नसम्म पछि पर्दैनन् ।

राजनीतिक पहुँच रहेकोले प्राधिकरणको कसैले केही बिगार्न नसक्ने सेवाग्राहीलाई साहले हाकाहाकी बताउने गर्छन् । बढीमा सरुवा गर्ने हो, त्यो भन्दा बढी कसैले केही गर्न नसक्ने सेवाग्राहीलाई साह बताउने गर्छन्। जनताको प्रत्यक्ष सेवा दिने कार्यालयमा रहेर कार्यालय संचालन गर्न सक्ने क्षमता साहमा नरहेको लिवाङका एक बुद्धिजीवीले बताए ।