सभापति पुनले बनाए सल्लाहकार समिति, पार्टी थप चलायमान हुने विश्वास

१६ भदौ, काठमाडौं । नेपाली कांग्रेस लुम्बिनी प्रदेशका सभापति अमरसिंह पुनले प्रदेश सल्लाहकार समिति गठन गरेका छन्। पार्टीका पुराना एवं अहिले सक्रिय पदमा नभएका नेताहरूलाई समावेश गरेर उनले समिति गठन गरेका हुन् ।

पहिले पार्टीको मुख्य भूमिकामा रहेका तर पछिल्लो समय बाहिर रहेका नेताहरूबाट सल्लाह, सुझाव एवं सांगठनिक अनुभव आदानप्रदानमा सहजता हुने विश्वासले समिति गठन गरिएको नेपाली कांग्रेस लुम्बिनी प्रदेशका सभापति अमरसिंह पुनले बताएका छन्। 

पार्टीमा रहेका पुराना अनुहारलाई साथमा लिन सकेमा पार्टी थप चलायमान हुने सभापति पुनको भनाइ रहेकाे पुनकाे सचिवालयले जनाएकाे छ । लुम्बिनी प्रदेशबाट प्रतिनिधित्व गर्दै राष्ट्रिय राजनीतिमा महत्वपूर्ण भूमिका निर्वाह गरेका व्यक्तिहरू, राज्यका विशिष्ट वडाका पूर्व प्रशासकहरू र विभिन्न विषयका विज्ञहरूलाई जिल्ला तहको सिफारिसको आधारमा मनोनयन गरिएको कांग्रेस लुम्बिनीले बताएको छ । 

सामाजिक रुपान्तरण, स्रोत साधनको परिचालन, खोज, अनुसन्धान एवं नीति निर्माणका क्षेत्रमा सल्लाहकारहरूलाई सक्रिय बनाइने सभापति पुनको तयारी रहेकाे पुनकाे सचिवालयले नेपालबहसलाई बताएकाे छ ।