दाङमा दृष्टिविहीन बालिका बलात्कारको आरोपमा बसका सहचालक पक्राउ

१७ भदौ, काठमाडौं । दाङको राप्ती गाउँपालिका–२ स्थित एक विद्यालयमा अध्ययनरत दृष्टिविहीन नाबालिकालाई जबर्जस्ती करणी गरेको आरोपमा एक जना पक्राउ परेका छन् ।

पक्राउ पर्नेमा आदर्श माविमा सहयोगीका काम गर्दै आइरहेका गढवा गाउँपालिका-१ झरौनीका ४५ वर्षीय रामबहादुर खनाल रहेको प्रहरीले जनाएको छ । 

खनालले १३ वर्षीया दृष्टिविहीन बालिका (छात्रा)लाई भदाै ४ गते दिउँसो कोही नभएको मौका पारेर बलात्कार गरेको आरोप छ । पीडित पक्षबाट किटानी जाहेरी परेपछि आज बिहान पक्राउ गरिएको हो । 

पीडित बालिकाको स्वास्थ्य परीक्षण गरिएको र आरोपीलाई जबर्जस्ती करणी कसुरमा अनुसन्धान गर्न अदालतबाट म्याद लिएको प्रहरीले जनाएको छ ।