बर्दिया कारागारबाट भागेका कैदी ‘भाइ नाइके’ भएको खुलासा

१७ भदौ, काठमाडौं । गएराति बर्दियाको जिल्ला कारागार गुलरियाको पर्खाल नाघेर भागेका कैदीबन्दै अजित बुढाक्षेत्री कारागारका ‘भाइ नाइके’ रहेको खुलेको छ । उनी बिहान ३ बजेतिर अन्य बन्दी निदाएको मौका पारी १६ फि अग्लो पर्खाल नाघेर भागेका हुन् । 

उनी २०७१ चैतमा ठाकुरबाबा नगरपालिका–८ का ७९ वर्षीय छिमेकी जोरासिंह थापाको हत्या गरेको गरेको अभियोगमा जिल्ला अदालतबाट दोषी ठहर ३० वर्षको सजाय काटिरहेका थिए । 

हत्यापछि लामो समयमा भारतमा लुकेर घर आएका बेला प्रहरीले ११ महिना अघि पक्राउ गरी अदालतको फैसला कार्यान्वयनका लागि कारागारमा राख्दै आएको थियो । त्यसक्रममा उनी केही महिना पहिले मात्र कारागारमा भाइ नाइके नियुक्त भएका थिए । 

भाइ नाइकेलाई हत्कडी लगाइँदैन । उनलाई कारागारका कैदीलाई रासनपानीको बन्दोबस्ती हेर्ने जिम्मा हुन्छ । अन्य कैदीबन्दीलाई भन्दा उनलाई बस्न छुट्टै सुविधा समेत दिइएको हुन्छ । त्यसअवस्थामा पनि उनी फेरि प्रशसानको आँखा छलेर भागेका हुन् । 

हत्या घटनापछि पक्राउ पर्दा बुढाक्षेत्री जिल्ला अदालतमा लैजाने क्रममा प्रहरीलाई झुक्याएर हतकडीसहित भागेका थिए । त्यसपछि उनी भारत पुगेका थए ।