ओलीको इच्छाविपरीत एमाले लुम्बिनी प्रदेश अध्यक्षका लागि रिजाल र कँडेलले दिए उम्मेदवारी

१७ भदौ, बुटवल । नेकपा एमाले लुम्बिनी प्रदेश अध्यक्षका लागि दुई जनाको उम्मेदवारी परेको छ । सहमतिको प्रयास असफल भएपछि राधाकृष्ण कँडेल र हरि रिजालले उम्मेदवारी दर्ता गरेका हुन् । प्रदेश अधिवेशन उद्घाटनका क्रममा अध्यक्ष केपी शर्मा ओलीले सहमतिको सन्देश दिन निर्देशन दिएपछि नेताहरु छलफलमा जुटेका थिए ।

सहमति नभएपछि एमाले उपाध्यक्ष विष्णु पौडेल र महासचिव शंकर पोखरेल समूहबीच भीडन्त हुन लागेको हो । कँडेल पार्टी उपाध्यक्ष विष्णु पौडेल निकट मानिन्छन् भने  रिजाल महासचिव शंकर पोखरेल निकट मानिन्छन् । दुई पक्षबीच सर्वसहमतिका लागि लामो प्रयास भएपनि सहमति नभएपछि दुई जनाले अध्यक्षमा उम्मेदवारी दर्ता गराएका हुन् । 

एमाले लुम्बिनी प्रदेश विभाग प्रमुख डीआर घिमिरेले अध्यक्षमा दुई जनाको उम्मेदवारी दर्ता भएको जानकारी दिए । उनले निर्वाचन आयोगले भोलि सोमबार १० बजेसम्म मनोनयन गर्ने समय दिएकाले अरुको पनि उम्मेदवारी दर्ता हुनसक्ने बताए । दुबै आकांक्षी एकअर्कालाई छाड्न तयार नभएपछि निर्वाचन नै हुने पक्का भएको छ ।