टेरामक्समा ठूलो घोटाला भएकाे आशंका छ : सांसद केसी

१८ भदौ, काठमाडौं । नेपाली कांग्रेसका नेता एवं सांसद अर्जुननर सिंह केसीले नेपाल दूरसंचार प्राधिकरणले टेलिफोन र मोवाइलमा लागू गराउन खोजिरहेका टेरामक्स प्रविधिमा घोटाला भएको आशंका भएको बताएका छन् । 

सोमबार प्रतिनिधिसभाको बैठकमा विशेष समयमा दलीय आधारमा धारणा राख्दै ग्राहकको टेलिफोन, मोवाइल फोनको गोपनियता रेकर्ड समेत गरिने प्रविधि (प्रणाली) टेरामाक्स लागू गर्न दबाब दिइरहेको कुराले प्रणाली भित्र्याउने क्रममा घोटाला भएको देखाउने उनले बताए । टेरामक्सको निष्पक्षता र ग्राहकको व्यक्तिगत गोपनियताको ग्यारेन्टीबारे छानबिन हुनुपर्ने बताए । 

उनले गएको आव २०७९/८० मा नेपाल टेलिकम र एनसेलको ग्राहक संख्या लाखौंले वृद्धि भएपनि राजश्व घटेको देख्दा हिनामिनाको आशंका भएको बताए । साथै उनले मुलुकमा अराजकता ढ्दै गइरहेको भन्दै व्यक्तिगत सानातिना विषयमा ‘सिंहदरबारमा आगो लगाइदिने’ भन्नेसम्मको अभिव्यक्ति सार्वजनिक हुन थालेको भन्दै यसप्रति सबै राजनीतिक दल ध्यान जानुपर्ने बताए ।

‘आगो वलगाउने होइन, आगो निभाउने काममा लाग्न आवश्यक छ’ उनले भने, ‘जनताको त्याग, बलिदान र कष्टपूर्ण आन्दोलनबाट प्राप्त हक अधिकार रक्षा गर्नेतर्फ सरकारले ध्यान दिन आग्रह गरे ।

यस्तै, २०७० निर्माण सुरु भएको पासाङ ल्हामू राजमार्गमा बजेट थप गर्न सरकारको ध्यानाकर्षण गराए । क्रमागत बजेट समेत कटौती गरेको भन्दै बजेटका लागि आफू निर्माणस्थलमै धर्ना बस्ने बताए ।