एमाले लुम्बिनी अधिवेशनमा उम्मेदवारको नामावली प्रकाशित

१८ भदौ, रुपन्देही । नेकपा एमाले लुम्बिनी प्रदेशको प्रथम अधिवेशनमा पार्टी प्रदेश कमिटीका पदाधिकारी तथा सदस्यहरूको चयनका लागि उम्मेदवारहरूको प्रारम्भिक नामावली प्रकाशित गरिएको छ । निर्वाचन कमिटीले जारी गरेको प्रारम्भिक नामावलीको सूचनामा अध्यक्षमा दुई, उपाध्यक्षमा चार र सचिवमा दुई जनाको उम्मेदवारी परेको छ । 

अध्यक्षमा  हरि रिजाल र राधाकृष्ण कँडेलको उम्मेदवारी परेको छ । उपाध्यक्ष पुजन विक, भोजप्रसाद श्रेष्ठ, विश्वराज बराल, शान्ताकुमारी वलीले उम्मेदवारी दिएका छन् । यस्तै सचिवमा लक्ष्मण आचार्य र सोमनाथ सापकोटाले उम्मेदवारी दिएका छन् ।  उपसचिव पुरुष तर्फ उपेन्द्रलाल कामी, दुर्गाप्रसाद थारु र पूर्णबहादुर बुढा मगरले उम्मेदवारी दिएका छन्  भने महिला उपसचिवमा लीला राना मगर र बसन्ती अधिकारीले उम्मेदवारी दिएको निर्वाचन समितिले जनाएको छ ।

शनिबारदेखि सुरू भएको नेकपा (एमाले) लुम्बिनी प्रदेशको प्रथम अधिवेशनमा नयाँ नेतृत्वका लागि सबै पदमा आवश्यकभन्दा बढी उम्मेदवारी परेको छ । त्यसैगरी सदस्यहरूमा ३ सय ६४ जनाको उम्मेदवारी परेको छ । ५ पदाधिकारीमा १४ र २ सय सदस्यमा त्यो भन्दा धेरै उम्मेदवारी परेपछि निर्वाचन प्रकृया थालिएको हो । 

अहिले दावी विरोधको समय चलिरहेको र त्यसपछि उम्मेदवरी फिर्ताको समय दिइएको निर्वाचन समितिका सदस्य विष्णु खनालले बताए । उनका अनुसार दावीविरोधपछि साढे २ बजेपछि पुनः उम्मेदवारहरुको नमावली प्रकाशन गरिने छ । अन्य निर्वाचन प्रकृयाको समय भने अहिले तोकिएको छैन ।