ललितानिवास जग्गा हिनामिना मुद्दामा प्रतिवादी तर्फका कानुन व्यवसायीको बहस जारी

१९ भदौ, काठमाडौं । बालुवाटारस्थिल ललितानिवासको सरकारी जग्गा हिनामिना मुद्दामा आज प्रतिवादीहरुका वकिलले थुनछेक बहस जारी राखेका छन् । न्यायाधीश भोलानाथ ढकालको इजलासमा सरकारी वकिल तर्फकाे बहस सोमबार नै सकिएको थियो । 

सोमबार ३ जना प्रतिवादीका वकिलले बहस गरेपनि बाँकी तर्फका वकिलहरूले बहस जारी राखेका छन् । प्रतिवादीका वकिलको बहस सकिन कम्तीमा २ दिन लाग्ने जनाइएको छ । तीन सय १२ जनालाई  जग्गा हिनामिनाको कीर्ते कसुरमा हाल १८ जना मात्र पक्राउ परेका छन् । बाँकीलाई फरार सूचीमा राखेर सीआईबीले खोजी गरिरहेको छ । 

थुनछेक बहस सकिएपछि प्रतिवादीहरुलाई थुनामा राख्ने किन धरौटीमा छोड्ने आदेश आउनेछ । हिनामिनामा गएको असार १२ मा पहिलोपटक भाटभटेनी सुपरमार्केटका संचालक मीनबहादुर गुरुङलाई पक्राउ गरेपछि पक्राउ श्रृंखला चलेको थियो । अन्य भने लुक्न र विदेश भाग्न सफल भएका छन् ।

पक्राउ परेका गुरुङसहित सबैलाई सीआईबीले कीर्ते र संगठित अपराध कसुरमा ६० दिन हिरासतमा राखेर अनुसन्धान गरेपनि सरकारी वकिलको कार्यालय काठमाडौंले कीर्ते कसुरमा मात्र मुद्दा चलाएको छ ।