रानीहार चाेरेर बैंक ऋण, आरोपी युवती प्रहरीको फन्दामा

१९ भदौ, काठमाडौं । लमजुङमा विभिन्न व्यक्तिको घरबाट सुनका गहना चोरी गरेको आरोपमा प्रहरीले एक जना युवतीलाई पक्राउ गरेको छ । जिल्ला प्रहरी कार्यालय लमजुङका अनुसार पक्राउ पर्नेमा बेशीशहर नगपालिका–७ की २७ वर्षीया सुजा घिमिरे रहेकी छन् । घिमिरेमाथि दुई वटा चोरीका घटनाको आरोप छ । 

सुजाले गत वैशाख २५ गते वडा ७ क्याम्पस रोडस्थित जमुना रिमालको घरबाट सुनका ठूलो परिमाणमा गरगहना चोरी गरेको खुलेको छ । त्यसपछि साउन ३० मा सोही वडाकी बालकुमारी घिमिरेको घरबाट सुनको गरगहना चोरी गरेको पाइएको छ । चोरीको तरिका र कनेक्सनमाथि अनुसन्धानका क्रममा एनजीओमा कार्यरत सुजाको संलग्नता देखिएपछि सोमबार पक्राउ गरिएको प्रहरीले जनाएको छ । 

जमुना सुजाकी साथी हुन् भने बालकुमारी साथीकी आमा हुन् । दुई जनाको घरमा करिब २३ तोला सुन तोला सुन चोरी गरिएको खुलेको छ । सुजाले चोरीको ३ तोला बेशीशहरस्थित नेपाल बैंक लिमिटेडका शाखामा धितो राखेर ऋण समेत लिएको खुलेको प्रहरीले जनाएको छ । 

पक्राउपछि तलासी लिने क्रममा सुजाको कोठाबाट बाँकी चोरिएका गहना एउटा रानीहार, २ वटा बाला, ४ वटा औंठी, सिक्री, मिनिहार, टप, लगायत गहनाहरू बरामद भएको जिल्ला प्रहरी कार्यालय लमजुङले जनाएको छ । आरोपीमाथि थप अनुसन्धान भइरहेकाे प्रहरीले जनाएकाे छ ।