सीमा क्षेत्रबाट एक पक्राउ गरिएका सुन तस्करीका आरोपी खरेललाई काठमाडौं ल्याइँदै

१९ भदौ, काठमाडौं । गएको साउन २ मा हङकङबाट उडानमार्फत ल्याइएको झण्डै ६० किलो सुन तस्करी प्रकरण भारतसँगको सीमा क्षेत्रबाट पक्राउ गरिएका आरोपी सुमन खरेललाई सीआईशीले काठमाडौं ल्याउँदैछ । 

रुपन्देही घर भई हाल काठमाडौँको टोखा बस्ने सुमन खरेललाई नेपाल भारत सीमा क्षेत्र कपिलवस्तुबाट सोमबार पक्राउ गरिएको थियो । उनलाई काठमाडौं ल्याउने क्रममा रहेको नेपाल प्रहरीका केन्द्रीय प्रवक्ता, प्रहरी नायब महानिरीक्षक कुबेर कडायतले जानकारी दिए । काठमाडौं ल्याई अनुसन्धानका लागि जिल्ला अदालतबाट म्याद लिने तयारी भइरहेको उनले बताए । 

सुन तस्करी प्रकरणको सूचना सङ्कलनका लागि सीआईबीले एक अधिकृतको टोली भारत पठाएको छ भने, अर्का अधिकृत एसएसपी दिनेशराज आचार्यको टोली हङकङ पठाइसकिएको छ । सुन तस्करीमा हालसम्म २५ जना पक्राउ परेका छन् । 

मोटरसाइकलको ब्रेकशुमा लुकाएर तस्करले ६० केजी ७१६ ग्राम सुन भिछ्याएका थिए । उक्त सुन त्रिभुवन अन्तर्राष्ट्रिय विमानस्थलबाट छिराउन सफल भएपनि सिनामंगलबाट नियन्त्रणमा लिइएको थियो । ब्रेकशु पगालेर जोख्दा उक्त परिमाणमा असल सुन ठहरिएको थियो । तस्करीमा राजनीतिक दल नेता र विमानस्थलका उच्च तहका कर्मचारीको मिलेमतो देखिएको छ ।

सोही आरोपमा आजै मात्र माओवादी केन्द्रका नेता एवं पूर्वउपराष्ट्रपति नन्दकिशोर पुनका छोरा दिपेश पुनलाई सीआईबीले सोधपुछ गरेर तारेखमा राखेको छ ।

यसभन्दा पहिले गत पुष १० मा विमानस्थलबाटै विद्युतीय चुरोटमा लुकाएर तस्करी भएको ९ केजी सुन प्रकरणमा माओवादी केन्द्र उपाध्यक्ष कृष्णबहादुर महरा र उनका छोरा राहुलको संलग्नता रहेको सीआईबीको प्रतिवेदनले जनाएको छ । राहुलले गत हप्ता प्रहरीसमक्ष आत्मसमर्पण गरेपनि बाबुलाई भने अझैअनुसन्धानकाे दायरा ल्याइएकाे छैन ।

यो पनि पढ्नुहोस