मधेश प्रदेशका सांसद अनिरुद्ध सिंह जेल चलान

१९ भदौ, काठमाडाैं । सप्तरी ४ (क)बाट मधेश प्रदेश सभामा विजयी स्वतन्त्र सांसद अनिरुद्ध सिंह यादवलाई ज्यान मुद्दाको पुर्पक्षका लागि जेल चलान गरिएको छ ।

उनलाई सप्तरी जिल्ला अदालतबाट मंगलबार भएको आदेशबमेजिम सप्तरी कारागार चलान गरिएको सप्तरी प्रहरीले जनाएकाे छ ।

सांसद यादवलाई प्रहरीले २०६४ असार ९ मा तत्कालीन एकीकृत नेकपा (माओवादी)का नेता भिपु भनिने ३२ वर्षीय गोविन्द चौधरीको अपहरण र हत्या अभियोगमा जिल्ला अदालतमा मुलतबीमा रहेको मुद्दामा सोमबार दिउँसो राजविराजबाट पक्राउ गरेको थियो । 

मृतककी दिदी धनगढी गाविस–३ की रीताकुमारी चौधरीले जिल्ला प्रहरी कार्यालय सप्तरीमा २०६४ असार १४ गते कर्तव्यज्यान मुद्दामा यादवसहित नौ जनामाथि किटानी जाहेरी दिएकी थिइन् । जाहिरीपरेपछि यादव फरार थिए । सोही मुद्दामा एक जनाले २०७२ मा सफाइ पाएका थिए भने एक जना धरौटीमा छुटेका थिए । 

फरार रहेका प्रतिवादीहरुको मुद्दा मुलतबीमा राखिएको थियो । मुद्दा रहेकै अवस्थामा गत आमनिर्वाचनमा जसपाबाट टिकट नपाएपछि स्वतन्त्र उम्मेदवारी दिएर विजयी भएका थिए । जेल परेसँगै यादवको सांसद पद  गुम्ने भएको छ ।