जनकपुरधाममा धर्म परिवर्तनसम्बन्धी प्रचार गरेकाे आराेपमा दुई जनालाई कालोमोसो

२० भदौ, काठमाडौं । क्रिश्चियन धर्मको प्रचार गर्दै हिँडेका केही व्यक्तिलाई जनकपुरधाममा एक समूहले कालो मोसो दलेर नियन्त्रणमा लिएर प्रहरीलाई बुझाएको छ । 

विभिन्न प्रलोभन देखाएर क्रिश्चियन धर्म प्रचार गर्दै हिँडेको आरोपमा मंगलबार हिन्दू सम्राट सेना नेपाल नामक समूहले जनकपुरधाम एक महिला र एक पुरुषलाई मोसो दलेका हुन् ।

जनकपुरधामको जनकपुर ट्रमा सेन्टर हस्पिटल अगाडिबाट कालो मोसो दलेर दुवै जनालाई प्रहरीलाई बुझाइएको थियो । उनीहरुले क्रिश्चियन धर्मका बाइबल लगायत पर्चा बाँडेर धर्म प्रचार गरेको सेनाको आरोप छ । 

पैसाको प्रलोभन देखाएर धर्म परिवर्तन गरेर हिँडेको पाइएपछि मोसो दलेर बजार परिक्रमा गराइएको संगठनले जनाएको छ । हिन्दू धर्मको गलत व्याख्या गर्दै बदनाम गरेर क्रिश्चियन धर्म प्रचार गरेको आरोप लगाइएको छ ।पक्राउ गरिएका दुवै जनालाई जिल्ला प्रहरी कार्यालय धनुषाको हिरासतमा राखिएका छन् ।

निजहरुमाथि आवश्यक अुनसन्धान भइरहेको धनुषा प्रहरीले जनाएको छ । कुनै धर्मबारे प्रचार गर्ने र धर्म परिवर्तन गर्न नपाइने कानूनी व्यवस्था रहेको छ । गर्नेमाथि कारवाही हुने व्यवस्था समेत छ ।