भारतीय सुरक्षाकर्मीद्वारा सीमानाकामा नेपालीलाई आउजाउमा कडाइ, नागरिकता अनिवार्य गराइयाे

२१ भदौ, काठमाडौं । नेपाली नागरिकका लागि भारत प्रवेश र स्वदेश फर्किन कुनै परिचय पत्रको आवश्यक पर्दैन । तर सुदूरपश्चिमकासहित नेपालीहरु रोजारीका लागि भारतका विभिन्न स्थानमा जानेहरुलाई नेपाल–भारत सीमा क्षेत्रमा भारतीय सीमा सुरक्षा बलले नेपाली नागरिकताको सक्कली प्रति माग्न थालेको छ ।गरिकता नहुनेलाइ आवतजावतमा कडाइ गरेको छ । 

चिनियाँ नागरिकको अवैध प्रवेश रोक्न नेपाली पक्षले नागरिकको आउजाउमा कडाइ गरिएको कञ्चनपुर जिल्ला प्रशासनले स्वीकारेपनि भारतीय पक्षबाट भइरहेको व्यवहारबारे जानकारी नरहेको जनाएको छ । 

धनगढीको गौरीफन्टा र कञ्चनपुरको गड्डाचौकी नाका भएर रोजगारीमा मात्र नभई किनमेलका लागि भारतीय बजारमा जाने नेपालीहरुलाई भारतीय सुरक्षाकर्मीले नागरिकता भएकालाई मात्र जान दिएको गुनासो सर्वसाधारणले गरेका छन् । सुदूरपश्चिमसहित कर्णाली प्रदेशका नागरिकले मुख्यगरी गौरीफन्टा र गड्डाचौकीको नाका प्रयोग गर्दै आएका छन् ।

उनीहरूले नाका प्रवेशमा नेपालीलाई  सहजता बनाउन स्थानीय प्रशासनसँग माग गरेका छन् ।