बालिका रेजिशाको मृत्यु प्रकरण : कान्तिबाल अस्पतालका निर्देशकलाई निलम्बन गर्न माग

२१ भदौ, काठमाडौं । बिहीबार जारी प्रतिनिधिसभाको बैठकमा बोल्ने सांसदहरुले सोमबार महारागन्जको कान्ति बाल अस्प्तालमा काठमाडौंकी ६ वर्षीया रेजिशा गोपालीको एइमर्जेन्सी कक्षमा उपचार नपाएर ज्यान गएको घटनाको छानबिन गर्न माग गरेका छन् । 

जनमतका सांसद अब्दुल खाणले बालिका रेजिशाको मृत्यु समयमै अस्पताल पुर्याउँदा समेत इमर्जेन्सी कक्षमा प्रवेश नदिने  सुरक्षा गार्ड र निर्देशन दिने अस्पतालका निर्देशक लगायत दोषी कर्मचारीलाई तत्काल कारवाही गर्न माग गरे । निष्पक्ष छानबिन र दोषीलाई कारवाहीका लागि अस्पतालका निर्देशकसहित कर्मचारीलाई तुरुन्त निलम्बन गर्न माग गरे । 

उनले घटनाबारे स्वास्थ्यमन्त्री मोहनबहादुर बस्नेतले सदनमा उभिएर जवाफ दिनुपर्ने बताए । बिरामी परेर समयमै अस्पतालमा पुर्याउँदा समेत उपचार नगरी ज्यान जाने तहसम्मका घटना अक्षम्य अराध रहेको उनको भनाइ छ । घटनाकाे छानबिन नभए अनसन बस्ने चेतावनी उनले दिए ।

यस्तै पूर्वमन्त्री समेत रहेका खाणले नेपालको सन्दर्भमा गत शनिबार काठमाडौंमा सार्वजनिक कार्यक्रममा चिनियाँ राजदूत छेन सोङले दिएको अभिव्यक्ति खेदजनक रहेको बताए । राजदूतलाई परराष्ट्रमन्त्रलयले तत्काल  स्पष्टीकरण सोध्नुपर्ने बताए । राजदूतले नेपालमाथि हेपाइपूर्ण अभिव्यक्ति दिएको भन्दै उनले आपत्ति जनाए । जनमत पार्टीले चिनियाँ राजदूत सोङलाई फिर्ता पठाउन माग गरेको छ ।

शनिबार एमालेले नयाँबानेश्वरमा आयोजना गरेको कार्यक्रममा नेपालका लागि चिनियाँ राजदूत सोङले नेपालले भारतसँग व्यापार सम्बन्ध राख्दासम्म नेपालको व्यापार घाटा कम नहुने अभिव्यक्ति दिएका थिए । जसको चौतर्फी विरोध भइरहेको छ ।