बैतडीमा चितुवा आक्रमणबाट किशोरी घाइते

♦ नरेन्द्र विष्ट

२१ भदौ, काठमाडौ । चितुवाको आक्रमणबाट बैतडीमा एक किशोरी घाइते भएकी छन् । बिहिबार  बिहान ११:५० बजेतिर चितुवाले आक्रमण गर्दा बैतडीको दुर्गम ठाउँ पन्चेश्वर गाउँपालिका वडा नम्बर ३ बगरेठीका जयराम लुहारकी अन्दाजी १७ वर्षीया छोरी पुजा लुहार घाइते भएको जिल्ला प्रहरी कार्यालय बैतडीले जनाएको छ ।
 
बिहीबार ११:५० बजेतिर घर नजिकैको रोल जङ्गलमा घाँस काटिरहेको बेला नरभंक्षी चितुवाले पुजालाई आक्रमण गरेको थियो । अहिले  पुजा गम्भीर घाइते भइ बेहोस अवस्थामा रहेको बताइएको छ। चिच्याएको होहल्ला सुनेर गाउँलेहरूले थाहा पाएको थियो ।
 
जिल्ला प्रहरी कार्यालय बैतडीका प्रहरी प्रमुख प्रेम शाहीका अनुसार घाइते पुजालाई उद्धार गरि उपचारका लागि उनलाई मेलौलीको केशरपुर प्राथमिक स्वास्थ्य केन्द्रमा लगेको प्रहरीले  बताएको छ ।

त्ल्लोसोराडका अधिकांश बस्ती चितुवाबाट प्रभावित छन् । २०६८ साल यता एक दशकको अवधिमा यो क्षेत्रका २७ जनाको चितुवाको आक्रमणमा परी ज्यान गएको छ,  भने जिल्लाभर हालसम्म चितुवाको आक्रमणबाट ३३ जना घाइते भएका जिल्ला प्रहरी कार्यालयले जनाएको छ ।