बाजुरामा एक महिला घरभित्र मृत फेला, हत्या भएको आशंका

२१ भदौ, काठमाडौं । बाजुराको बुढीनन्दा नगरपालिका–१० पाण्डुसैनमा एक जना महिला आफ्नै घरभित्र मृत फेला परेकी छन् । बिहीबार पाण्डुसैनकी जयपुरा शाही आफ्नै घरमा मृत फेला परेकी हुन् । 

बुधबारदेखि घरबाहिर नदेखिएकी शाही उनको घरभित्र आज बिहान फेला परेकी हुन् । नदेखिएपछि शंका लागेर घरमा जाँदा छिमेकीले मृत अवस्थामा फेला पारेका थिए । त्यसपछि उनीहरुले प्रहरीलाई खबर गरेका थिए । मृतक शाहीको घाँटीमा डोरीले बाँधिएर झुण्डिएको अवस्थामा फेला परेको प्रहरीले जनाएको छ । 

उनी श्रीमानले दोस्रो विवाह गरेपछि लामो समयदेखि माइती घरमा एक्लै बस्दै आएकी थिइन् । आफन्तले शाहीको हत्या भएको भन्दै प्रहरीलाई किटानी जाहेरी दिएका छन् । 

शवको पोस्टमार्टम रिपोर्ट आएपछि मात्र मृत्युका कारण पत्ता लाग्ने प्रहरीको भनाइ छ । पोष्टमर्टम कोल्टी प्राथमिक स्वास्थ्य केन्द्रमा गरिएको छ । हत्यारा पत्ता लगाएर कारवाही गर्न स्थानीयले माग गरेका छन् ।