स्थानीय तहको ६० प्रतिशत रकम निक्षेपमा गणना गर्न दिइने

२२ भदौ? काठमाडौं । आउँदो आइतबारदेखि स्थानीय तहको पैसालाई बैंकमा निक्षेपमा गणना गर्न पाउने व्यवस्था गरिएको छ । अर्थ मन्त्रालयको स्वीकृतिमा नेपाल राष्ट्र बैंकले आइतबारदेखि स्थानीय तहमा जाने पैसालाई बैंकहरुले निक्षेपको रूपमा गणना गर्न पाउने भएको हो । 

बैंकहरुले गत आर्थिक वर्ष २०७९/८० को असार मसान्तसम्म स्थानीय तहको ८० प्रतिशत रकमलाई निक्षेपको रूपमा गणना गर्दै आएका थिए । सो व्यवस्था चालु आर्थिक वर्ष २०८०/८१ को मौद्रिक नीतिले खारेज गरेसँगै बैंकहरु तनावमा थिए । अब स्थानीय तहको ६० प्रतिशत रकम निक्षेप राख्न पाइनेछ । यसअनुसार कुनै बैंकमा १ करोड रुपैयाँ स्थानीय तहको पैसा भएमा ६० लाख रुपैयाँ मात्रै निक्षेप गणना हुनेछ ।

नयाँ व्यवस्थाले सरकारी स्वामित्वको वाणिज्य बैंकहरुलाई हुने भएको छ । स्थानीय तहले राष्ट्रिय वाणिज्य बैंक, कृषि विकास बैंक, नेपाल बैंक लिमिटेडमार्फत कारोबार गर्दै आइरहेको छ । निक्षेपका आधारमा कर्जा समेत प्रवाह गर्न पाउने भएपछि यी बैंकहरुलाई थप सुविधा मिल्ने भएको छ ।

स्थानीयको तहको रकमलाई निक्षेपमा गणना गर्न पाउनुपर्ने माग वाणिज्य बैंकहरुले निरन्तर रुपमा राख्दै आइरहेको थियो । त्यसमा अर्थ मत्रालयले केही सर्त राखेर राष्ट्र बैंकलाई पत्र लेखेको हो ।