स्वार्थ समूहबाट स्थिर वातावरण बिथोल्न खोजिँदैछ, सतर्क रहनू : प्रधानसेनापति

२४ भदौ, काठमाडौं । प्रधानसेनापति प्रभुराम शर्माले स्वार्थ समूहले देशको स्थिर वातावरण खल्बल्याउने कोशिस गरिरहेको भन्दै सजग र सतर्क रहन सेना पंक्तिलाई निर्देशन दिएका छन् ।

उनले प्रधानसेनापतिको जिम्मेवारी सम्हालेको दोस्रो वर्ष पूरा भएका अवसरमा आइतबार जङ्गीअड्डामा आयोजित कार्यक्रममा नेपाली सेनाका सकल दर्जालाई सम्बोधन गर्दै उनले तथ्यहीन र पूर्वाग्रही बेमौसमी तर्क झिकेर केही स्वार्थप्रेरित समूहले क्षणिक र प्रायोजित अभिलाषा राखेर वातावरण खलबल्याउने प्रयास गरिरहेको बताए । 

नेपालको एकीकरण अभियानको थालनीदेखि नै सेनाले देशको सार्वभौमसत्ता, भौगोलिक अखण्डता, स्वतन्त्रता, राष्ट्रिय एकता एवं जनभरोसालाई सदैव जोगाइराख्न अग्रणी भूमिका निर्वाह गर्दै आइरहेको उनले बताए ।  सेनाले सामूहिक प्रयासबाट आर्जन गरेको गरिमा र जनविश्वासका लागि सकल दर्जालगायत निजामती कर्मचारी र आश्रित परिवारजनलाई धन्यवाद ज्ञापन गरे । 

सैन्य संगठन आजको भोलि तयार गर्न सकिने विषय नभएको बताउँदै कार्यकालको दुई वर्षको लक्ष्य र प्राप्ति उपलब्धिको समीक्षा समेत गरिएको सैनिक जनसम्पर्क तथा सूचना निर्देशनालयले जनाएको छ । 

नेपाली सेना  लामो अध्ययन, तयारी, अभ्यास र अनुभवले निखारिएर सुदृढ र अनुशासित संगठन रहेको बताउँदै नयाँ प्रविधि, नयाँ परिवेश तथा अगामी बहुआयामिक चुनौती सामना गर्दै अगाडि बढ्न सक्षम रहेको बताए । 
कार्यकालको तेस्रो वर्ष थालनीको पूर्वसन्ध्यामा प्रधानसेनापति शर्माले छाउनी तथा सैनिक मञ्च टुँडिखेलमा रहेको वीर स्मारकमा माल्यार्पण गरेका थिए । 

उनले कर्तव्य पालनाको सिलसिलामा घाइते भएका सैनिकहरूकाे स्वास्थ्यलाभको कामना गरे । उनले कार्यक्रमा उपरथीमा बढुवा भएका कुमारबाबु थापा र महासेनानीमा पदोन्नति भएका प्रमुख सेनानी सुदर्शन विष्टलाई दर्ज्यानी चिन्ह प्रदान गरे ।