वर्षमान पुन निकट भण्डारीको बयानपछि तस्करी सुनको अनुसन्धान माओवादी नेतातर्फ बढाउँदै सिआईबी

२५ भदौं, काठमाडौं । सुन तस्करी प्रकरणको अनुसन्धान नेकपा माओवादीका नेताहरुतर्फ सोझिन थालेको छ । नेकपा माओवादी केन्द्रका नेता बर्षमान पुनका बिश्वास पात्र भीमकान्त भण्डारीसँगको बयानपछि नेपाल प्रहरीको केन्द्रिय अनुसन्धान ब्युरोले (सीआइबी) ले सुनको अनुसन्धान नेतातर्फ केन्द्रित गर्न लागेको छ । आइतबार भण्डारीलाई कार्यालयमा बोलाएर सोधपुछ गरेको थियो । 

बिध ल्याबका सञ्चालकसमेत रहेका भण्डारी माओवादीका पुर्व मन्त्री पुनका बिश्वास पात्र हुन् । नेता कृष्णबहादुर महरा, उनका छोरा राहुल र पूर्वउपराष्ट्रपति नन्दकिशोर पुनका छोरा दिपेश पुनसँग मााओवादी नेताका निकटमा रहेकासमेत यसप्रकरणमा सम्लग्न भएको भेटिएपछि सीआईबीले अन्य माओवादीका नेताहरुको सम्लग्नता खोज्न थालेको छ । 

कोरोना कालमा अस्वभाविक सम्पत्ति आर्जन गरेको देखेपछि अख्तियार र सम्पत्ति शुद्धीकरणको समेत मुद्दा खेपीरहेका भण्डारीको हालै भइरहेको सुन तस्करी प्रकरणमा पनि संलग्नता पुष्टी हुने आधार देखा परेको सिआइबीको ठहर छ । नायबसुब्बा मात्रै रहेका भण्डारीको माओवादीका नेताहरुसँग राम्रै उठबस छ । भण्डारीले पुन र महरा अर्थमन्त्री भएका समयमा काम गरेका थिए । 

सामान्य प्रशासनमन्त्री हितराज पाण्डे र समाज कल्याणमन्त्री आशा कोइरालाको सचिवालयमा पनि उनले काम गरेका थिए । सरकारी कर्मचारी भए पनि माओवादीका प्रभावशाली मन्त्रीको सचिवालयमा कार्य गरेको भण्डारीले छोटो समयमा नै अस्वभाविक आम्दानी बढेको थियो । 

हाल उनीबिरुद्ध बिशेष अदालतमा मुद्धा दर्ता गरिएको छ । उनको सम्पति रोक्का गरी मुद्दा चलाइरहेको बेला हालै भएको ६० केजी सुन तस्करी प्रकरणामा अस्वभाविक संलग्नता देखा परेपछि सीआइबीले बोलाएर सोधपुछ गरेको हो । उनको बयान नसकिएकाले आज सोमवार पनि थप बयान लिइदैछ ।  

सीआईबीले मओवादीका नेताहरुसँग सुन तस्करीको कनेक्सन रहेको थहा पाएपनि उनीहरुलाई अनुसन्धानको दायरामा ल्याउन सकेको छैन् । प्रधानमन्त्री पुष्पकमल दाहाल प्रचण्ड र उपप्रधान तथा गृहमन्त्री नरायणकाजी श्रेष्ठको संरक्षण रहेका कारण पनि सीआईबीलाई अनुसन्धानमा बाधा उत्पन्न भइरहेका छ । केवल नेताका आसेपासेसँग बयान लिएर सम्लग्न रहेका नेताहरुलाई समाउन सकेको छैन् ।