मकवानपुरमा डेंगु रोगीको संख्या दिनदिनै बढ्दै

२६ भदौ, बागमती । हेटौँडा उपमहनगरपालिकासहित मकवानपुर जिल्लामा लामखुट्टेको टोकाइबाट हुने डेंगु रोगीको संख्या दिनदिनै बढ्दै गएको छ । जिल्ला स्वास्थ्य कार्यालयका अनुसार गत साउन एक गतेदेखि हालसम्म डेङ्गुबाट संक्रमितको संख्या चार सय २१ पुगेको छ ।

 उक्त कार्यालयका अनुसार जिल्लामा हालसम्म सबैभन्दा बढी संक्रमित हेटौँडा उपमहानगरपालिकामा रहेको र त्यहाँ अहिलेसम्म  तीन  सय २९ जनामा डेङ्गु  फेला परेको छ । 
 
त्यसैगरी थाहा नगरपालिकामा एक, मकवानपुरगढी गाउँपालिकामा ११, बागमती गाउँपालिकामा २०, मनहरि गाउँपालिकामा ३३, इन्द्रसरोवर गाउँपालिकामा दुई, भीमफेदी गाउँपालिकामा  दस, वकैया गाउँपालिकामा १४ तथा  विकट एवं दुर्गम राक्सिरागङ गाउँपालिकामा एकजना  डेङ्गु संक्रमित  फेला परेको छ ।
 
उक्त कार्यालयको विवरणअनुसार सो  अवधिमा जिल्लामा एक पुरुषको डेङ्गुबाट मृत्यु भएको थियो । जिल्लामा  सोमबारसम्म  थप १२ जनामा डेङ्गुको संक्रमण फेला परेकामा हेटौँडा उपमहानगरपालिकामा छ, मकवानपुरगढी गाउँपालिकामा एक, मनहरि गाउँपालिकामा दुई जनाका साथै यहाँ बस्दै आएका अन्य जिल्लाका तीन जनामा पनि  संक्रमण फेला परेको थियो ।
 
जिल्लामा  दैनिक सरदर दशभन्दा बढी व्यक्ति  डेङ्गुबाट संक्रमित भइरहेका अनुमान उक्त कार्यालयले गरेको छ ।