भारतीय सेनाका कर्णेलले गरे देहरादुनमा तनहुँकी युवतीको हत्या

२८ भदौ, काठमाडौं । भारतको देहरानुमा तनहुँकी युवती श्रेया शर्माको हत्या भएको छ । हत्यामा संलग्नताको आधारमा  भारतीय सेनाका ४२ वर्षीय लेफ्टिनेन्ट कर्णेल रामेन्दु उपाध्यायलाई प्रहरीले पक्राउ गरेको छ । 

तनहुँको भानु नगरपालिका,६ चोक चिसापानी श्रेया शर्मा नामले चिनिने ३० वर्षीया सुमित्रा घर्तीलाई आइतबार बिहानै देहरादुनस्थथित प्रहरी कार्यालय सडक क्षेत्रसँगैको सिलवारगढको किनानरको नालामा मृत अवस्थामा भेटिएकी थिइन् । घटनाको अनुसन्धानका क्रममा कर्णेल उपाध्याय पक्राउ परेका हुन् । उनलाई अदालले अनुसन्धानका लागि १४ दिन हिरासतमा राख्न प्रहरीलाई अनुमति दिएको छ । 

दोषी पत्ता नलाग्दा शव पोष्टमार्टम गर्न कठिन भइरहेका बेला उपाध्यायले युवतीको हत्या आफूले गरेको बयान प्रहरीलाई दिएका छन् । उतराखण्ड प्रहरीले शवको पहिचान भएपश्चात नेपालमा परिवारजनलाई खबर गरेको थियो । शवको बुधवार पोस्टमार्टम गरिएको थियो । परिवारका सदस्य तनहुँबाट हिँडेपनि देहरादुन पुगेका छैनन् ।

श्रेया पूर्वी नेपालको सीमा क्षेत्रमा पर्ने भारतको सिलगुढीमा डान्सबारमा काम गर्दै आइरहेकी थिइन् । त्यसक्रममा कर्णेलसँग प्रेम सम्बन्ध बनेको र उपाध्याय देहरादुन सरुवा हुँदा श्रेयालाई त्यही लगेर राखेका थिए । पछि श्रेयाले विवाहित उपाध्यायसँग विवाह गर्न नमान्दा हत्या भएको खुलेको छ ।

शनिबार राति आरोपी उपाध्यायले श्रेयालाई मदिरा खुवाएर बेहोस अवस्थामा टाढा पुर्याएर शिर र निधारमा हथौडाले प्रहार गरेर हत्या गरेको बयान दिएको प्रहरीको भनाइ उदृध गर्दै भारतीय संचारमाध्यमले जनाएका छन् । ज्यान गुमाएकी श्रेया भानु नगरपालिकाकी रहेको पुष्टि भएको जिल्ला प्रहरी कार्यालयले जनाएको छ ।