सिटिजन लाइफ इन्स्योरेन्सको आईपीओ बाँडफाँट, कसरी हेर्ने रिजल्ट ?

२८ भदौ, काठमाडौं । सिटिजन लाइफ इन्स्योरेन्सको आईपीओ बिहीबार बाँडफाँट भएको छ । यसमा गोलाप्रथामार्फत ९ लाख जना सर्वसाधारण आवेदकहरुले १० कित्ताका दरले शेयर पाएका छन् । यो आईपीओमा कुल १५ लाख ८४ हजार ५९७ जनाले आवेदन दिएकामा १ लाख ७७ हजार ३६० जनाको आवेदन रद्द भएको बिक्री प्रबन्धक एनआइएमबी क्यापिटलले जानकारी गराएको छ ।

योग्य १४ लाख ७ हजार २३७ आवेदकलाई गोलाप्रथामा सहभागी गराइएको थियो । कम्पनीले भदौ १५ गतेदेखि १९ गतेसम्म सर्वसाधारणलाई प्रतिकित्ता १४४ रूपैयाँ प्रिमियम थप गरेर २४४ रूपैयाँ दरमा आईपीओ बिक्री खुला गरेको थियो । सर्वसाधारणका लागि कुल ९० लाख कित्ता शेयर बिक्री गरिएको थियो ।

लगानीकर्ताले बिक्री प्रबन्धक एनआइएमबी क्यापिटलको वेबसाइट र मेरो शेयर एकाउन्टबाट आइपीओको नतिजा हेर्न सक्नेछन् । साथै, सिटिजन लाइफ इन्स्योरेन्सको वेबसाइट तथा सीडीएस एन्ड क्लियरिङले आइपीओ रिजल्ट हेर्न बनाएको वेबसाइट https://iporesult.cdsc.com.np/ बाट पनि नतिजा हेर्न सकिन्छ ।