मलद्वारमा लुकाएर ल्याइएको १ किलो सुन तस्करीमा तरुण दलका नेताको संलग्नता !

२८ भदौ, काठमाडौं । सोमबार दुबईबाट यात्रु काभ्रेका बाबुलाल दोङले मलद्वारमा लुकाएर ल्याएको करिब एक केजी सुन त्रिभुवन आन्तर्राष्ट्रिय विमानस्थलबाट बरामद भएको घटनाका नेपाली कांग्रेसको युवा संगठन नेपाल तरुण दलका एक नेताको नाम जोडिएको छ  ।

काठमाडौं प्रहरी परिसर टेकुका अनुसार घटनामा तरुण दलका नेता विकास लामाको नाम जोडिएको हो । लामा काभ्रेका हुन् । उनी यसपहिले मोटरसाइकल चोरी र ज्यान मार्ने उद्योग कसुरमा जेल बसेर निस्केका पाइएको प्रहरीले जनाएको छ । 

केही समय दुबई रोजगारमा बसेर फर्किएका लामा २ वर्षदेखि सुन तस्करीमा लागेको पाइएको प्रहरीको भनाइ छ । दुबई छँदा लामाले दुबई–भारत रुट बनाएर केही समय सुन तस्करी समेत गरेको स्रोतले बतायो ।

पछिल्लो समय उनले वर्षदेखि नेपालबाट मान्छे पठाएर दुबई–काठमाडौं रुट बनाएर सुन तस्करी गर्दै आइरहेको स्रोतको दाबी छ । उनी लगानीकर्ताकाे रूपमा चिनिने गरेकाे बताइन्छ ।  दुबईबाट सुन बोकेर हिमालयन एयरलाइन्सबाट काठमाडौं आएका बेला योपटक पक्राउ परेका दोङ र उनले ल्याएको सुन लिन (रिसिभ गर्न) विमानस्थल पुगेका काभ्रेकै जगत लामा र मिङ्मा दोर्जे स्याङ्तान पनि पक्राउ परिसकेका छन् । दोङ पटकपटक दुबइ आउजाउ गरेकाे रेकर्ड प्रहरीले फेला पारेकाे छ ।

स्करीको सुन लिन विकासले आफ्नै गाडी दिई दुई जनालाई विमानस्थल पठाएको खुलेको छ । उनको प्रदेश ०१ २७ च ९९६० नम्बरको गाडी प्रहरीले नियन्त्रणमा लिइसकेको छ । विमानस्थलमा यो गिरोहलाई ‘विकास ग्रुप’को नामले चिनिने बताइएको छ । सहयोगी तीन पक्राउ परेदेखि विकास सम्पर्क विहीन भएका छन् । उनका सम्बन्धमा सुक्ष्म अध्ययन भइरहेको प्रहरीले जनाएको छ । विकास कांग्रेस नेता तीर्थबहादुर लामा, यन्द्र बाँनियाँ निकट मानिन्छन् 

यो पनि पढ्नुहोस