सुरक्षा निकायका प्रमुखसँग छलफल गरेर किन शीतलनिवास गए कार्यवाहक प्रधानमन्त्री खड्का ?

३१ भदौ, काठमाडौं । कार्यवाहक प्रधानमन्त्री पूर्णबहादुर खड्का सिंहदरवारमा सुरक्षा निकायका प्रमुखसँगको छलफल सकिएपछि राष्ट्रपति कार्यालय शीतलनिवास गएका छन् । उनले राष्ट्रपति रामचन्द्र पौडेलसँग भेटेर देशको शान्ति सुरक्षाको अवस्थाबारे जानकारी गराएका छन् । आइतबार अपरान्ह खड्कासहित उपप्रधान तथा गृहमन्त्री नारायणकाजी श्रेष्ठले सुरक्षा निकायका प्रमुखहरूसँग छलफल गरेका थिए । 

रक्षा मन्त्रालयमा भएको छलफलमा मुख्य सचिव, प्रधानसेनापति, गृह सचिव, रक्षा सचिव, सशस्त्र प्रहरी प्रमुख, राष्ट्रिय अनुसन्धानका प्रमुख, नेपाल प्रहरीका कार्यवाहक प्रमुखको सहभागिता थियो । छलफलमा कार्यवाहक प्रधानमन्त्री तथा रक्षामन्त्री खड्काले सुरक्षा निकाय प्रमुखसँग देशको समग्र शान्ति सुरक्षाको अवस्थाबारे जानकारी लिएका थिए । 

संविधान दिवसका अवसरमा दिने आम माफीबारे छलफल गर्न खड्का राष्ट्रपति कार्यालय गएको बताइएको छ ।  राष्ट्रपति कार्यालयले आम माफीका लागि पठाएका व्यक्तिहरुकाबारे राष्ट्रपति कार्यालयले चासो राखेको थियो । राष्ट्रपति कार्यालयले आम माफी दिनुपर्नाको कारण गृह मन्त्रालयसँग मागेपछि यसै सिलसिलामा छलफल गर्न खड्का शीतलनिवास गएको बताइएको छ । 

प्रधानमन्त्री पुष्पकमल दाहाल संयुक्त राष्ट्रसंघको महासभामा सहभागीता जनाउन शनिबार अमेरिका प्रस्थान गरेका छन् । प्रधानमन्त्री अमेरिकाबाटै चीन भ्रमणमा जाने कार्यतालिका छ । प्रधानमन्त्री प्रचण्ड नभएको अवस्थामा गर्नुपर्ने कामको जिम्मेवारी खड्काले नै पाएका छन् ।