काठमाडाैंमा सुनको सिक्री लुटपाट गर्ने गिरोहका ४ सदस्य पक्राउ

२ असोज, काठमाडौं । प्रहरीले महिलाले घाँटीमा लगाएको सुनको सिक्री लुटपाट गर्ने गिरोहका ४ जनालाई पक्राउ गरेको छ । पक्राउ पर्नेमा बागबजारका सुरज गुरुङ, पर्साको वीरगञ्ज घर भइ क्षेत्रपाटी बस्ने अनवर हुसेन अन्सारी र अन्य दुई जना भारतीय नागरिक रहेका छन् ।

प्रहरीका अनुसार सोमबार पक्राउ परेका भारतीय नागरिक शक्ति भौमिक र सचिन गाड्वे छन् । उनीहरुले लुटपाट गरी ल्याइएको सिक्री खरिद गरेको खुलेको छ । 

गुरुङले चलाएको मोटरसाइकलमा बसेर अन्सारीले भदौ २५ गते  काठमाडौंको कुलेश्वर बस्ने अप्सरा श्रेष्ठको घाँटीमा लगाई राखेको अन्दाजी २ तोला बराबरको सुनको लकेट सहितको सिक्री लुटेर फरार भएका थिए । अरोपीहरुविरुद्ध डाँका कसुरमा अनुसन्धान हुने जनाइएको छ । डाँका कसुरमा लुटपाट बराबरको बिगो वा जरिवानार वा कैद वा दुवै कैद सजाय हुने कानूनी व्यवस्था छ । कैद सजायतर्फ कम्तीमा ५ वर्ष हुने व्यवस्था रहेकाे छ ।