शिक्षकहरुलाई गगन थापाको आग्रहः विद्यालय बन्द गर्ने अप्रिय बाटो त्याग्नुस्, संसदबाटै विधेयक सच्याउँछौं

४ असोजप, काठमाडौं । नेपाली कांग्रेसका महामन्त्री एवं संघीय सांसद गगनकुमार थापाले आन्दोलनरत शिक्षकहरुलाई आन्दोलनको स्वरुप परिवर्तन गर्न आग्रह गरेका छन् ।

पूर्वघाेषित आन्दोलनकाे दोस्रो दिन बिहीबार पनि सामूदायिक विद्यालयका शिक्षकहरुले पाठनपाठन ठप्प पारेर काठमाडौंमा आन्दोलनमा उत्रिएपछि सांसद थापाले सामाजिक संजालमार्फत सन्देश पोष्ट गर्दै संसदमा दर्ता भइसकेको विद्यालय शिक्षा विधेयकमा थुप्रै कमजोरी रहेको र त्यसलाई अध्ययन गर्ने र सच्याउने जिम्मेवारी सांसदहरुको भएको समेत उनले स्पष्ट पारेका छन् । विधेयक संसदमा आइसकेको र यसलाई शिक्षकको भावना र आवश्यकता अनुरुप संशोधन गर्ने प्रतिवद्धता समेत जनाएका छन् । 

‘संसदमा दर्ता भइसकेपछि अब यो विधायिकाको कर्तव्य र जिम्मेवारी हो। हामी सबैसँग घनिभूत छलफल र संवाद गर्नेछौँ । आन्दोलनरत शिक्षक, स्थानीय सरकार लगायत सरोकारवाला र चिन्तित अभिभावक एवं विद्यार्थी सवैका जायज माग र चिन्ताको संवोधन गर्ने कुरामा प्रतिबद्ध छौ’ उनले लेखेका छन् । 

उनले विद्यालय बन्द गर्ने बाटो अप्रिय भएको र यसलाई परिवर्तन गर्न समेत उनले आन्दोलनरत शिक्षकहरुसँग आग्रह गरेका छन् । ‘सांसदको भूमिका एवं विवेकमाथि विश्वास गरेर रचनात्मक ढङ्गले समाधानको खोजीका लागि मद्दत गर्न र विद्यालय बन्द गर्ने अप्रिय बाटो अवलम्बन नगरी आन्दोलनको स्वरूप परिवर्तन गर्न शिक्षक महासंघ लगायत सबै पक्षमा हार्दिक आग्रह गर्दछु’ उनले भनेका छन् ।

शिक्षामन्त्री अकोशकुमार राईले गत बुधबार मात्र विद्यालय शिक्षा विधेयक दफावार छलफलका लागि संसदमा दर्ता गराएका थिए । विधेयकले शिक्षकहरुको विद्यमान अधिकारलाई कुण्ठित गरेको, राजनीतिक दलले गोटी बनाउन खोजिएको लगायत बुँदा अघि सारेर बुधबारदेखि देशभरबाट सामसुदायिक विद्यालयमा शिक्षकहरु विद्यालय बन्द गरेर काठमाडौंकेन्द्रित आन्दोलनमा उत्रिएका छन् । विद्यालय बन्द गरेर आन्दोलनमा जाने शिक्षकलाई कारवाही गर्ने केही स्थानीय तहको चेतावनीलाई समेत उनीहरुले चुनौति दिएका छन् । अहिले पनि नयाँबानेश्वर क्षेत्रमा विरोधसभा गरिरहेका छन् ।

शिक्षामन्त्री राईले मंगल र बुधबार दुई दिन नै वार्तामा आउन आन्दोलित शिक्षकहरुलाई आह्वा गरेका थिए । तर उनीहरुले विधेयक संसदमा दर्ता भइसकेको अवस्थामा मन्त्रीसँगको वार्ताको औचित्य नरहेको भन्दै वार्ता अस्वीकार गरेका छन् । प्रधानमन्त्री वा विधेयक संशोधन गर्न सक्ने तहका सरकारी टोलीसँग मात्र वार्तामा बस्ने अडान राखेका छन् । प्रधानमन्त्री प्रचण्ड हाल संयुक्त राष्ट्रसंघीय ७८औं महासभामा भाग लिने अमेरिकाको न्यूयोर्कमा छन् । उनी त्यतैबाट भोलि चीन भ्रमणमा जाने र असोज १३ गतेमात्र स्वदेश फिर्ता हुने कार्यक्रम छ ।

यो पनि पढ्नुहोस