कांग्रेस केन्द्रीय समितिको बैठक सानेपामा जारी, सभापति देउवाद्वारा आठजनालाई केन्द्रीय समितिमा मनोनीत

४ असोज, काठमाडौं । नेपाली कांग्रेसको केन्द्रीय समिति बैठक सानेपामा जारी छ । बैठकमा समसामयिक राजनीति, पार्टीको आन्तरिक संरचनालगायत विषयमा छलफल भइरहेको छ । बैठकले महासमिति बैठकको एजेन्डा तय गर्ने बताइएको छ । कांग्रेसले आगामी मंसिसर १३, १४ र १५ गतेका लागि महासमिति बैठक बोलाएको छ । यसैबीच बैठकअघि कांग्रेसले ८ जनालाई केन्द्रीय समिति सदस्यमा मनोनीत गरेको छ । 

सभापति शेरबहादुर देउवाले चन्द्र भण्डारीसहित आठजनालाई केन्द्रीय सदस्यमा मनोनीत गरेका हुन् ।  महाधिवेशनबाट निर्वाचित नभएका महाधिवेशन प्रतिनिधिहरूबाट ३३ केन्द्रीय सदस्य देउवाले मनोनीत गर्न पाउने विधानमा व्यस्था छ । यस अघि पटक–पटक गरी देउवाले २३ केन्द्रीय सदस्यको नियुक्ति गरिसकेका छन् । थप आठ नियुक्ति भइसकेपछि अब देउवाले मनोनीत गर्न पाउने संख्या दुई मात्र बाँकी छ ।

नेपाली कांग्रेसका सभापति शेरबहादुर देउवाले नेपाली कांग्रेसको विधान, २०१७ (संशोधनसहित) को धारा २१ को उपधारा (१०) बमोजिम मानबहादुर विश्वकर्मा (अर्घाखाँची), अर्जुनप्रसाद जोशी (पर्वत), डा. चन्द्र भण्डारी (गुल्मी), शिवप्रसाद हुमागाई (काभ्रेपलाञ्चोक), किरणराज शर्मा पौडेल (बाग्लुङ), भरतकुमार शाह (रुपन्देही), शारदा पौडेल (कास्की) र अनिलकुमार रुंगटा (पर्सा) लाई नेपाली कांग्रेस केन्द्रीय कार्यसमितिको सदस्य पदमा मनोनयन गर्नु भएको छ, कांग्रेसको विज्ञप्तिमा भनिएको छ ।