इन्डो-प्यासिफिक आर्मी चिफ कन्फरेन्समा भाग लिन प्रधानसेनापति दिल्ली जाने

४ असोज, काठमाडौं । प्रधानसेनापति प्रभुराम शर्मा इन्डो–प्यासिफिक आर्मी चिफ कन्फरेन्समा भाग लिन भारतको नयाँ दिल्ली जाने भएका छन् ।

सेना प्रमुखहरुको १३औं संस्करणको कन्फेरेन्समा सहभागी हुन प्रधानसेनापति शर्मा आउँदा आइतबार दिल्ली जाने सैनिक जनसम्पर्क तथा सूचना निर्देशनालयले जानकारी दिएको छ । 

नयाँ दिल्लीमा २०८० असोज ८ गतेदेखि १० गतेसम्म इन्डो–प्यासिफिक आर्मी चिफ कन्फेरेन्स हुँदैछ । कन्फेरेन्स भारतीय सेना र अमेरिकी सेनाले संयुक्त रूपमा आयोजना गर्न लागेका हुन् । कन्फेरेन्सकाे मुल नारा ‘शान्तिका लागि एकैसाथ : हिन्द–प्रशान्त क्षेत्रमा दिगो शान्ति र स्थायित्व’ राखिएको छ । यसमा ३५ मुलुकका सैन्य प्रतिनिधिमण्डल सहभागी हुँदैछन् । प्रधान सेनापति शर्मालाई भारतीय सेनाध्यक्ष मनोज पाण्डेले निमन्त्रणा गरेको बताइएको छ ।

नेपाल सहित १५ देशका सेनापतिहरू सम्मेलनमा सहभागी हुने कार्यक्रम छ । नेपाल, भारत, अमेरिका, अस्ट्रेलिया, बङ्गलादेश, इन्डोनेसिया, जापान, मलेसिया, भुटान, ब्रुनाई, कम्बोडिया, कोरिया, मालदिभ्स, मङ्गोलिया, म्यानमार, न्युजिल्याण्ड लगायतका देशका प्रधान सेनापतिहरू सो सम्मेलनमा सहभागी हुँदैछन् ।

शर्माका साथ ४७औं इन्डो-प्यासिफिक आर्मी म्यानेजमेन्ट सेमिनारमा सहभागी हुने उपरथी योगराज शर्मा र महासेनानी वसन्तबहादुर गौतम तथा नवौं सिनियर इनलिस्टेड लिडर्स फोरममा सहभागी हुने प्रमुख सुबेदार रत्नबहादुर थापा पनि जानेछन् । उनीहरु असोज ११ मा मात्र स्वदेश फिर्ता हुनेछन् ।

इन्डो–प्यासिफिक अमेरिकाको अवधारणामा बनेको सैन्य संगठन हो । संगठनमा  एसिया प्यासिफिक क्षेत्रका मुलुकहरुका सेनालाई संरचनागत रुपमा आवद्ध गराउने रणनीति रहेकाे छ । यसअघिकाे १२औं संस्करण ‘प्यासिफिक कमान्ड’ नामबाट कन्फेरेन्स गरिएकाे थियाे । आयोजकले चार वर्षअघि देखि ‘इन्डो–प्यासिफिक’ भन्न थालेका हुन् ।​​​​​​​ १२ औँ संस्करणमा सहभागी भैसकेका छन् ।

छिमेकी चीनले भने इन्डो-प्यासिफिकलाई आफूलाई घेरा हाल्न अमेरिकाले तयार पारेको सैन्य संरचना भन्दै आपत्ति जनाउँदै आइरहेको छ ।

अमेरिकाले चीनलाई आर्थिक उन्नतिमा प्रमुख प्रतिपस्पर्धी ठान्दै आइरहेको सन्दर्भमा चीनसँगको सीमा विवाद झेलिरहेको भारतले इन्डो–प्यासिफिकमा बेजोड साथ र संलग्नता जनाउँदै आएको छ ।