बाँकेको बाल सुधार गृहबाट फरार ९ कैदी अझै सम्पर्कबाहिर

५ असोज, बाँके । बाँकेको बालसुधार गृहमा गएराति भएको झडपपछि फरार भएका कैदीबन्दी मध्ये ९ जना अझै सम्पर्कविहीन छन् । डडुवा गाउँपालिका–६ मा रहेको जयेन्दु बालसुधार गृहमा राति १० बजेबाट कैदीबन्दीबीच झडप भएको थियो ।

झडपमा १ जनाको ज्यान गएको थियो भने ११ जना घाइते भएका थिए । ज्यान गुमाउनेमा कञ्चन गाउँपालिका–४, रुपन्देहीका सुलभ केसी रहेको प्रहरीले जनाएको छ । गम्भीर घाइते उनको उपचारका क्रममा मृत्यु भएको हो । उनी अपहरण, शरीर बन्धक तथा जबरजस्ती करणीको कसुरमा सजाय काटिरहेका थिए । गृहमा विभिन्न कसुरमा दोषी ठहर भई सजाय काटिरहेका १८ देखि ३२ वर्षसम्मका कैदीहरु छन् ।

झडप हुँदा सुधार गृहको भवनका रेलिङ, बार र पर्खाल भत्काएर सुधार गृहमा रहेका २५४ जना नै बाहिर निस्किएका थिए । तीमध्ये २४५ जना नियन्त्रणमा आइसकेको जिल्ला प्रहरी कार्यालयले जनाएको छ । अन्य ९ जना अझै सम्पर्कमा आइनसकेको जनाएको छ । उनीहरुको खोजीका लागि प्रहरी परिचालन गरिएको छ । कैदीहरुले खान, बस्न र सुत्न साथै समयमै उपचार पाउनुपर्ने माग राखेर कारागार प्रशासनसँग असन्तुष्ट जनाउँदै आइरहेका छन् ।

यसअघि २ भदौमा भक्तपुरको सानोठिमीस्थित बाल सुधार गृहमा बालकैदी रामेछापका कमल बस्नेतको मृत्यु भएपछि तोडफोड गरेर कैदीबन्दीहरु भागेका थिए । उनीहरुले बिरामी पर्दा समयमा उपचार नपाएर बस्नेतको मृत्यु भएको भन्दै प्रशासनको विरोध गरेका थिए । त्यस घटनामा वीरगन्ज सारिएका १८ कैदीबन्दीसँग वीरगञ्जस्थित सुधार गृहमा अन्य कैदीहरूसँग झडप भएको थियो । त्यसक्रममा नाै जना घाइते भएका थिए । त्यसपछि १८ जनालाइ जिल्ला प्रकाकाे हिरासतमा राखिएकाे छ ।