दशैको अवसर पारेर राष्ट्र बैंकद्वारा चाँदीका सिक्का बिक्री गर्न सुरु, गाई अंकित २५ ग्राम सिक्काको मूल्य ४ हजार

७ असोज, कठमाडौं । दशैको अवसर पारेर लागि नेपाल राष्ट्र बैंकले सिक्का बिक्री गर्न सुरु गरेको छ । राष्ट्र बैंकले पुरानो मेसिन मर्मत गरेर मुद्रणको काम सुरु गरी सिक्का बेच्न लागेको हो । आइतबार गभर्नर महाप्रसाद अधिकारीले गाईको चित्र अंकित नयाँ सिक्का सार्वजनिक गरेपछि बिक्री सुरु भएको हो ।

अहिले १० ग्राम र २५ ग्रामका दुई किसिमका चाँदीका मेडालियन सिक्का टकमरी गरी बिक्री सुरु गरेको छ । राष्ट्र बैंकको सुन्धारास्थित टक्सार महाशाखा बबरमहलको नेपाल औषधि उद्योगको परिसरमा स्थानान्तरण गरेर सिक्का मुद्रणको काम थालेको छ । १० ग्रामको सिक्काको १६ सय र २५ ग्रामको ४ हजार रुपैयाँ मूल्य निर्धारण गरिएको छ ।

राष्ट्र बैंकसँग मौज्दात रहेका चाँदीलाई गलान गरी नयाँ सिक्का तयार पारिएको हो । मुद्राको दर तय नगरी निष्कासन गरिएको सिक्कालाई मेडालियन भनिन्छ । महाशाखाले आइतबारदेखि राष्ट्रिय जनावर गाईको चित्र अंकित ‘मेडालियन सिक्का’को बिक्री वितरण सुरु गरेको छ । राष्ट्र बैंक सञ्चालक समितिको २०८० जेठ १९ गते बसेको बैठकले उक्त १० ग्राम र २५ ग्रामका मेडालियन सिक्काको टकमरी गर्न स्वीकृति दिएको थियो ।

राष्ट्र बैंकसँग मौज्दात रहेको चाँदीलाई गलाएर मेडालियन सिक्का टकमरी गरिएको टक्सार महाशाखाले जनाएको छ । टकमरी गरिएको दुवै सिक्कामा ९९९ टचको चाँदीको प्रयोग गरिएको छ । दर उल्लेख नगरी निष्कासन गरिएको सिक्कालाई ‘मेडालियन’ भनिन्छ । सर्वसाधारणबाट हुने सिक्काको मागलाई दृष्टिगत गरी यसको टकमरीलाई निरन्तरता दिइने महाशाखाले जनाएको छ ।