उच्चस्तरीय जाँचबुझ आयोगको क्षेत्राधिकारबारे तल्लो तहका नेतामा सहमति भएन, अब शीर्ष तहमा छलफल हुने

 ७ असोज, काठमाडौं । सुन तस्करीको छानविन गर्न गठन हुने उच्चस्तरीय जाँचबुझ आयोगको कार्यादेशबारे भएको छलफल बिना निष्कर्ष टुंगिएको छ । केन्द्रीय अनुसन्धान व्यूरो (सीआईबी)ले गरेको अनुसन्धानलाई मान्यता दिएर अध्ययन गर्ने कि सुन तस्करीको आफैं अनुसन्धान गर्ने भन्नेमा सत्तारुढ र विपक्षी दलहरुबीच विवाद छ । 

तल्लो तहका नेतामा सहमति नभएपछि सुन तस्करी प्रकरणबारे छानविन गर्न उच्चस्तरीय जाँचबुझ आयोग गठनको विषय फेरी शीर्ष तहमा पुगेको छ । आइतबार सत्ता गठबन्धन र प्रमुख प्रतिपक्षी दल नेकपा एमालेका प्रतिनिधिबीच छलफल भएपछि यसलाई शीर्ष नेताको बैठमा पठाउन लागिएको हो । एक महिनाअघि आयोग गठन गर्ने सहमति भएपनि यसको क्षेत्राधिकारका विषयमा दलहरुबीच मतभेद छ । 

सत्ता गठबन्धन र एमालेबीच आयोग गठनका विषयमा सहमति जुट्न सकेको छैन । आइतबार आयोग गठन गर्ने र क्षेत्राधिकार के–के हुने भन्ने विषयमा छलफल भएपनि एमालेले फरक मत राखेको छ । सिंहदरबारस्थित गृह मन्त्रालयमा भएको छलफलमा नेपाली कांग्रेसका प्रमुख सचेतक रमेश लेखक, नेकपा एमालेका नेता विष्णु पौडेल र सचेतक महेश बर्तौला तथा माओवादी केन्द्रका मुख्य सचेतक हितराज पाण्डे सहभागी थिए ।

बैठकपछि नेताहरुले छलफल सकारात्मक दिशातर्फ अघि बढेको र अब शीर्ष नेताले छलफल गरेर टुंग्याउने बताए । कांग्रेसका प्रमुख सचेतक रमेश लेखकले छलफल सकारात्मक भएको बताए । उनले आयोग गठन गर्ने पूरानै सहमति भएपनि अहिले नमिलेको कुरा यसको क्षेत्राधिकार के हुने भन्ने भएको बताए । उनले मौजुदा कानून र संरचनामा के–कस्तो परिवर्तन गर्नुपर्छ? त्यसको सुधारकालागि सुझाव दिने हो, अर्को भनेको अहिलेको घटनाको अनुसन्धानलाई निष्कर्षमा पुर्याउने कुरा भएको जानकारी दिए । 

त्यसबारे छलफलमा एमाले सकारात्मक भएपनि शीर्ष नेतृत्वसँग छलफलपछि मात्रै निर्णय दिने भनेपछि छलफल निष्कर्षमा पुग्न नसकेको लेखकले बताए । गठबन्धन र एमालेबीच आयोगले पछिल्लो घटनामा शुन्यबाट अनुसन्धान गर्ने वा यसअघि सीआईबीले गरेको अनुसन्धानलाई टेकेर थप अनुसन्धान अघि बढाउने भन्ने विषयमा कुरा मिलेको छैन ।

प्रमुख सचेतक लेखकले राज्यका स्थायी संरचनाले गरेको अनुसन्धानलाई विश्वासमा लिएर थप अनुसन्धान गर्न सकिने गरी व्यवस्था गर्न सकिने बताए । तर एमालले भने सरकारले अहिले अनुसन्धान गर्न नसकेको भन्दै सुरुबाटै अनुसन्धान गर्नुपर्ने भन्दै आएको छ । बैठकपछि एमाले सचेतक बर्तौलाले आयोगको कार्यादेश स्पष्ट हुनुपर्ने अडान राखेको बताए । उनले आइतबारै आयोग गठन गरेर कार्यभार सुम्पिने गरी काम अघि बढाउन सुझाव दिएको बताए । एमाले नेताहरुले अध्यक्ष केपी शर्मा ओलीसँग छलफलपछि आइतबारै साँझ ५ बजे फेरि बैठक बस्ने उनले जानकारी दिए ।