नालीमा डुबेर मृत्यु भएका बालकको परिवारलाई २ लाख दिन उपभाेक्त समिति सहमत

८ असोज, काठमाडौं । जनकपुरधाम उपमहानगरपालिका–२५ स्थित केउटानी टोलमा गत साता नालीको चेम्बरमा डुबेर मृत्यु भएका बालकको परिवाररलाई  उपभोक्ता समितिले २ लाख रुपैयाँ राहत दिने भएको छ । 

वडाध्यक्ष चन्देश्वर साहको समन्वयमा वडा कार्यालयमा भएको छलफलमा मृतक परिवारलाई समितिले २ लाख एक सय रुपैँया दिने सहमति भएको हो । 

स्थानीय रञ्जित मुखिया र पुनिताका १७ महिने छोरा रोहनको गत भदौ २९ गते खुला चेम्बरमा डुबेर मृत्यु भएको थियो । छलफलमा तीन वर्षअघि निर्माण भएको सडकको चेम्बर ढक्कन नलगाई अलपत्र छाडेका कारण बालक दुर्घटनामा परेको निष्कर्ष निकालिएको थियो । 

सहमति अनुसार समितिले पीडित परिवारलाई यही महिना रकम दिने र पीडित परिवार कानूनी उपचारमा नजाने सहमति भएको जनाइएको छ ।