पोखरा महानगरमा छोरीमात्र पाउनेलाई ५० हजार पुरस्कार कार्यक्रम

८ असोज, पोखरा । पोखरा महानगरपालिकामा महिला केन्द्रित कार्यक्रम ल्याइएको छ । महानगरको वडा नं. १२ ले वडामा छोराछोरीबीच समानता ल्याउन र समाजमा वंश धान्न छोरा नै चाहिन्छ भन्ने मान्यता हटाउन भन्दै छोरी मात्र पाउने दम्पतिलाई नगद पुरस्कारको घोषणा गरेको छ । 

वडा अध्यक्ष सन्तोष वास्तोलाका अनुसार २ वटासम्म छोरी जन्माएर परिवार नियोजन गर्ने दम्पतिलाई ५० हजार रुपैयाँ दिने नीति लिइएको छ । पोखराका स्वासथ्य संस्थाहरुमा छोरा भए राख्ने नत्र भ्रूण हत्या नै गर्ने क्रम बढेपछि दम्पतिमा सचेतना ल्याउने उद्देश्यले कार्यक्रम अघि सारेको उनले वास्तोलाले बताए । अपांगता भएका व्यक्तिहरुका लागि उपचार गर्न निशुल्क सवारी साधनको व्यवस्थासमेत वडाले  गर्ने भएको उनले बताए । याे कार्यक्रम अन्य वडाहरूले पनि सुरू गर्ने तयारी गरेका छन् ।

वडाले वडाभित्रका विद्यालयहरुमा प्राविधिक क्षेत्रमा अध्ययन गर्ने विद्यार्थीलाई पनि वडाले नै निशुल्क इन्टरनेटको व्यवस्था गर्ने भएको छ । यसबाट विद्यालयहरुमा शिक्षण सिकाइ क्रियाकलापमा आइसिटी (सूचना र सञ्चार प्रविधि)को प्रयोग हुने विश्वासको वडाको छ । शितलादेवी सामुदायिक विद्यालय, अमरसिंह उच्च माविलगायतमा आईसिटी कक्षाको रुपमा विकास गर्ने भएको छ । विद्यालयमा कम्तिमा हप्तामा १ दिन जीवनोपयोगी शिक्षा प्रदान गर्ने नीति लिएको छ । 

यस्तै,  बैतडीको दोगडाकेदार गाउँपालिकाले छोरी जन्माउने आमालाई एक हजार प्रोत्साहन भत्ता दिँदै आएकाे छ ।