नोटकोष सुविधा लिएका बैंकसँग राष्ट्र बैंकले माग्यो नयाँ नोटको विवरण, दशैंमा क्यूआर कोडलाई प्राथमिकता दिइने

९ असोज, काठमाडौं । नेपाल राष्ट्र बैंकले नोटकोषको सुविधा लिएका बाणिज्य बैंकहरुसँग नयाँ नोटको विवरण मागेको छ । दशैका लागि आवश्यक नयाँ नोटको व्यवस्था मिलाउन राष्ट्र बैंकले बैंकसँग भएका नयाँ नोटबारे जारकारी मागेको हो । बैंकहरुमा गतवर्षको बाँकी रहेका नोटको विवरण प्राप्त भएपछि राष्ट्र बैंक यो वर्ष चाहिने आवश्य नयाँ नोटको व्यवस्था गर्नेछ । 

नयाँ नोटमा पनि नगद कारोबार कम गरी डिजिटल भुक्तानीलाई प्रोत्साहन गर्न राष्ट्र बैंकले क्यूआर कोडलाई प्राथमिकता दिएको छ । यसवर्ष क्यूआर कोडमार्फत धेरै कारोबार हुने अपेक्षा राष्ट्र बैंकको छ । दसैं र तिहारमा हरेक वर्ष ६० देखि ७० अर्ब रुपैयाँ बराबर नयाँ नोट जाने गरेको राष्ट्र बैंकको भनाइ छ । यसमध्ये १२ देखि १५ अर्ब रुपैयाँ सर्वसाधारणमा जाने गरेको छ । 

धरै रकम बैंक तथा वित्तीय संस्थाले लाने गरेका छन् । दसैं र तिहारको अवसरमा सामान्य सिक्कासँगै चाँदी र सुनले बनेका सिक्का पनि बिक्री हुँदै आएको छ । नेपाल राष्ट्र बैंक मुद्रा व्यवस्थापन विभाग प्रमुख नरेश शाक्यका अनुसार यस वर्षको दसैं र तिहारमा पनि नेपाल राष्ट्र बैंकले प्रतिव्यक्ति १८ हजार ५ सय दरले नयाँ नोट सटही सुविधा दिने तयारी गरेको छ । दसैं, तिहार र छठलाई लक्ष्य गरी घटस्थापनादेखि नयाँ नोट सटही सुविधा सुरु गर्ने उनले बताए । अहिले बैंकसँग कति नोट भन्ने जानकारी लिन विवरण मागिएको हो । 

बैंक तथा वित्तीय संस्था र सर्वसाधारणको मागअनुसार के कति थप गर्नुपर्ने हो भन्नका लागि राष्ट्र बैंकका प्रादेशिक कार्यालय र नोटकोष सुविधा लिएका बैंकसँग नयाँ नोटको विवरण मागेको र नोटको विवरण संकलन भइसकेपछि घटस्थापनाको आसपासदेखि सर्वसाधारणलाई नयाँ नोट सटही सुरु गर्ने तयारी राष्ट्र बैंकको छ । 

यसअघि पनि राष्ट्र बैंकले प्रतिव्यक्ति १८ हजार ५ सय रुपैयाँ बराबर नयाँ नोट सटही सुविधा दिएको थियो । १८ हजार ५ सयमा रु ५ देखि १ सयसम्मको बन्डल रहनेछन् । बैंक तथा वित्तीय संस्थालाई भने राष्ट्र बैंकले ग्राहकको संख्या र संस्थाको मागअनुसार नयाँ नोट उपलब्ध गराउने भएको छ । राष्ट्र बैंकले आफ्ना कार्यालयमार्फत सर्वसाधारण र बैंक तथा वित्तीय संस्थालाई वर्षभर नै नयाँ नोट वितरण गर्दै आएको छ । 

दसैं, तिहार र छठका लागि सर्वसाधारणबाट नयाँ नोटको माग धेरै आउने गरेको छ । राष्ट्र बैंकसँग पर्याप्त नोट स्टकमा रहेको र नागरिकको माग पनि सम्बोधन गर्नुपर्ने भएकाले यही असोज अन्तिम सातादेखि सूचना जारी गर्ने राष्ट्र बैंकले जनाएको छ । विद्युतीय भुक्तानीलाई प्रोत्साहन गर्ने यस वर्षदेखि राष्ट्र बैंकले नयाँ नोट सटही गर्न आउनेलाई क्यूआर कोडअन्तर्गत भुक्तानी गर्न आग्रह गर्ने जनाएको छ ।