ताल्चा विमानस्थलमा समिटले एयरले छाडेका चिकित्सक लिन पठाइयो निगमको जहाज

९ असोज, काठमाडौं । मुगुस्थित ताल्चा विमानस्थलमा समिट एयरको जहाजले छाडेका डाक्टरहरूलाई लिन नेपाल वायु सेवा निगमले आफ्नाे जहाज पठाएको छ ।

डाक्टरहरु नेपालगन्ज आउन टिकट काटिसकेको अवस्थामा समिटकाे जहाजले माओवादी केन्द्रका नेता मातृका यादवसहितलाई बोकेर आएपछि उनीहरु अलपत्र परेका थिए ।

ताल्चा विमानस्थलबाट नेपालगन्ज आउन छुटेका चिकित्सकहरूलाई गन्तव्यमा पुर्‍याउन नेपाल वायुसेवा निगमको जहाज तत्काल पठाइसकेको संस्कृति, पर्यटन तथा नागरिक उड्डयन मन्त्री सुदन किराँती जानकारी दिए ।

मन्त्री किरातीले ताल्चा विमानस्थलबाट नेपालगन्ज आउने छुटेका चिकित्सकहरूको खबरले आफूलाई दुःखित बनाएको भन्दै समस्या समाधान गर्न निगमको जहाज पठाइसकिएको जानकारी सामाजिक संजालमार्फत दिएका छन् । ‘चिकित्सकहरुलाई गन्तव्यमा पुर्‍याउन नेपाल वायुसेवा निगमको जहाज तत्काल पठाइएको छ’ उनले मंगलबार लेखेका छन् ।