अभियन्ता ईःको जीवन रक्षा गर्न सरकारलाई मानवअधिकार आयोगको आग्रह

१० असोज, काठमाडौं । राष्ट्रिय मानव अधिकार आयोगले काठमाडौं महानगरपालिकाको निर्णयविरुद्ध उभिएर ९ दिनदेखि उभिएर धर्ना दिँदै आएका अभियन्ता ईःको जीवन रक्षा गर्न आग्रह गरेको छ । ईःले उठाएका मागबारे गम्भीर बन्न सम्बन्धित पक्षको ध्यानाकर्षण गराएको छ । 

आयोगका सहसचिव एवम् प्रवक्ता टीकाराम पोखरेलले आज विज्ञप्ति जारी गर्दै आफ्नो स्वास्थ्य र जीवनै जोखिममा पारी कठिन प्रदर्शन नगर्न र प्रदर्शनका अन्य विकल्प खोज्न अभियन्ता ‘ई’लाई आग्रह पनि गरेका छन् । चाैबिसै घण्टा उभिएका कारण ई: काे स्वास्थ्यमा समस्या देखिनुका साथै दुवै खुट्टा सुन्निएका छन् ।

 ‘धर्नामा रहेका व्यक्ति ‘ई’को स्वास्थ्य अवस्थाप्रति संवेदनशील भई निजको जीवन रक्षाका लागि पहल गर्न, वास्तविक पीडित र साना सडक व्यवसायीहरुको पहिचान गरी उनीहरुलाई पेशा र रोजगारीको वैकल्पिक व्यवस्था गर्न आयोग नेपाल सरकार र काठमाडौं महानगरपालिको ध्यानाकर्षण गराउँदछ । साथै, आफ्नो स्वास्थ्य र जीवन नै जोखिममा पारी कठिन प्रदर्शन नगर्न र प्रर्दशनका अन्य विकल्प खोज्न आयोग सम्बन्धित पक्षलाई पनि आग्रह गर्दछ’ विज्ञप्तिमा भनिएको छ । 

अभियन्ता ईःले महानगरपालिकाले हटाएको फुटपाथ व्यवसायीलाई विकल्पसहित व्यवस्थापन गर्न समेत ध्यानाकर्षण गराएको छ । फुटपाथमा बसेर व्यापार गर्दै आएकाहरुलाई विकल्प दिन माग गर्दै काठमाडौं महानगरपालिकाको कार्यालय राष्ट्रिय सभागृह अगाडि निरन्तर उभिएर ईःले विरोध जनाउँदै आएका छन् । उनलाई साथ दिन आजदेखि विस्थापित फुटपाथ व्यापारी समेत सडकमा पुगेका छन् ।