एमालेकाे बागमती प्रदेश अधिवेशनः मतदान समय सरेको सर्यै

११ असोज, काठमाडौं । नेकपा (एमाले)को बागमती प्रदेश कमिटीको नयाँ नेतृत्व चयनका लागि मतदान गर्ने समय पटपकटक सरेको छ । आज बिहान ८ बजेदेखि मदान सुरु हुने भनिएकोमा तालिका ११ बजेका लागि सारिएको थियो । ११ बजेपछि सुरु हुन सकेन । निर्वाचन अधिकृत डिल्ली मैनालीले मतदान दिउँसो १ बजेबाट हुने बताएका छन् । 

निर्वाचन मण्डलले मतदाताको अन्तिम नामावली समेत सार्वजनिक गर्न सकेको छैन । अधिवेशनका लागि १ हजार १७४ मतदाता छन् । अध्यक्षका लागि अध्यक्ष पदका पाँच जनाले उम्मेदवारी दिएका छन् । १ बजे पनि मतदान सुरु हुनेमा प्रतिनिधिहरुले शंका गर्न थालेका छन् ।

सहमतिको प्रयास विफल भएपनि उम्मेद्वार संख्या घटाउने प्रयासका क्रममा नेताहरुकै कारण मतदानमा ढिलाई भएको स्रोतको भनाइ छ । केशव पाण्डे, कृष्णप्रसाद दाहाल, कैलाश ढुङ्गेल, सानु श्रेष्ठ र केदारबहादुर बुढाथोकीले उम्मेदवारी दिएका छन् । 

मुख्य गरी ढुंगेल र दाहालबीच प्रतिस्पर्धा हुने देखिएको छ । ढुंगेललाई पार्टी अध्यक्ष केपी शर्मा ओलीले साथ दिएका छन् । कमिटीमा ५ पदाधिकारी रहने विधानको व्यवस्था छ । उपाध्यक्ष, सचिव, उपसचिव लगायतका पदमा पनि धेरै जनाले उम्मेदवारी दिएका छन् ।

उता बिहीबार सुरु भएको कर्णाली प्रदेश अधिवेशनमा पनि प्रदेश कमिटी चयन गर्न मतदान हुने देखिएको छ । सहमतिको प्रयास असपल भएपछि भोलि शुक्रबारबाट निर्वाचन प्रक्रिया गर्न नेताहरु सहमत भएको बताएका छन् । 
यसअघि सहमति प्रयास विफल भएपनि लुम्बिनीमा मतदानबाटै प्रदेश कमिटी नेतृत्वसहित कमिटी निर्वाचित भएका थिए । अध्यक्ष ओलीले मतदानमा जाँदा प्यानल नबनाउन निर्देशन दिँदै आएका छन् । बनाए उम्मेदवारी नै खारेज गर्ने चेतावनी दिएका छन् । यसका बाबजुद बागमतीमा ढुंगेल र दाहालबीच प्यानल बनाएर चुनावमा जाने संभावना बढेको छ । प्यानल बनाउन केन्द्रीय पदाधिकारीबाटै माहाेल बनाउने काम भइरहेकाे प्रतिनिधिहरूकाे भनाइ छ ।