तिब्बतसँग सीमा जोडिएको क्षेत्र फलेक हुँदै नेपाल भित्रिएको ४ किलो सुन दोलखामा बरामद, तीन जना पक्राउ

११ असोज, काठमाडौं । पछिल्लो पटक त्रिभुवन अन्तर्राष्ट्रिय विमानस्थल हुँदै नेपाल भित्रिएको ६१ किलो सुनको अनुसन्धानको किनारा नलाग्दै सुन तस्करीका घटनाहरु एकपछि अर्को गर्दै बाहिरिएका छन् ।

विमानस्थल बाहिर ठूलो परिमाणामा सुन बरामद भएको केहि समय पछिनै रसुवा नाका हुँदै पैदल मार्गबाट आएको २ किलो सुन बराम भएको थियो । त्यसपछि बिहीबार दोलखामा ४ किलो सुन  बरामद भएको छ । 

त्रिभुवन विमानस्थल भन्सार भएर आउने सुनमा कडाई हुन थालेपछि तस्करहरुले यसको विकाल्पका रुपमा साना भन्सार नाका र छिटफुट मानिस मात्र आवत जावत गर्ने नाकाको प्रयोग गर्न थालेको प्रहरीको अनुमान छ । उनीहरुले मानिस प्रयोग गरेर यस्ता नाकाबाट सुन भित्राउन थालेका छन् । दोलखाको सिंगटीबाट ४ किलो सुन बरामद हुनु पनि यसैको उदाहरण हो । 

सुन जस्तो देखिने चार थान बिस्कुट बरामद गरिएको दोलखा प्रहरी कार्यालयले जनाएको छ । सुन जस्तो देखिने धातु बरामद गरेर परीक्षणमा पठाइएको छ । इलाका प्रहरी कार्यालय सिंगटी र जिल्ला प्रहरी कार्यालय दोलखाको टोलीले सुन कारोबारमा संलग्न ३ जनालाई नियन्त्रणमा लिएको छ । यो सुन तिब्बत र दोलखाको सिमाना फलेक हुँदै आएको प्रहरीको प्रारम्भिक अनुसन्धान छ ।

नेपाल प्रहरीको केन्द्रीय अनुसन्धान ब्यूरो (सीआईबी) ले आफ्नो रायसहितको प्रतिवेदन जिल्ला सरकारी वकिल कार्यालयमा बुझाउँदा पछिल्लो ११ महिनामा ३ अर्ब ५० करोड रुपैयाँ बराबरको ३ सय ६३ किलो सुन तस्करी गरी नेपाल ल्याइएको प्रतिवेदनमा खुलाएको छ । सीआईबीले सुन तस्करी प्रकरणको मुद्दा अदालतमा गए पछि समातिएका आरोपीको बयान सकिएर थुनछेक बहस भइरहेको छ ।