उडान नियम उल्लंघन गरेपछि श्री एयरलाइन्स र फिस्टेल एयर कारवाहीमा, एएस ३५० हेलिकप्टर उडानमा रोक

११ असोज, काठमाडौं । हवाई क्षेत्रको नियामक निकाय नेपाल नागरिक उड्डयन प्राधिकरणले उडान नियम उल्लंघन गरेको आरोप श्री एयरलाइन्स र फिस्टेल एयर कम्पनीलाई कारवाही गरेको छ । उच्च हिमाली क्षेत्रमा उडान गर्दै आएका यी दुई कम्पनीले तोकिएको मापदण्ड पालन नगरे कारण कारबाही गरिएको प्राधिकरणले जनाएको छ । 

यी कम्पनीले खराब मौसममा पनि लुक्ला क्षेत्रमा उडान गरेका थिए । प्राधिकरणले उडान गर्न नहुने भनि तोकेको समयमा त्यसको उल्लंघन गर्दै हेलिकोप्टर उडाएपछि दुई कम्पनीका हेलिकोप्टरको उडानमा रोक लगाइएको हो । प्राधिकरणका अनुसार दुई कम्पनीका एएस ३५० बी ३ ई मोडलका हेलिकोप्टरको उडानमा आज बिहीबारदेखि नै प्रतिबन्ध लगाइएको छ । 

प्राधिकरणका अनुसार यसरी प्रतिबन्ध लाग्ने कम्पनीमा श्री एयरलाइन्स र फिस्टेल एयरका हेलिकोप्टर छन् । यी कम्पनीले भिजिबिलिटी १ सय मिटर समेत नभएको अवस्थामा समेत भीएफआर नियम उल्लंघन गर्दै हेलिकोप्टर उडाएपछि प्राधिकरणले अर्को निर्णय नभएसम्मका लागि हेलिकोप्टर उडानमा रोक लगाउने निर्णय गरेको हो । यी कम्पनीका अन्य मोडलका हेलिकोप्टरको उडानमा भने रोक नलगाइएको बताइएको छ ।