रोकिराखेको रोलरबाट डिजेल चोरी, २ युवक पक्राउ

१२ असोज, काठमाडौं । तनहुँको आँबुखैरेनीमा रोकिराखेको रोलरबाट डिजेल चोरी गरेको आरोपमा प्रहरीले २ जना युवकलाई पक्राउ गरेको छ । आँबुखैरेनी गाउँपालिका–२ ढापटारमा पार्किङ गरी राखिएको रोलरबाट डिजेल चोरी बिक्री गरेको आरोप उनीहरुमाथि लगाइएको छ ।

पक्राउ पर्नेमा तनहुँको बन्दीपुर गाउँपालिका–५ याम्पाका २७ वर्षीय सुलोचन भट्टराई र रुपन्देहीको तिलोत्तमा नगरपालिका–१० का २८ वर्षीय रामबहादुर चमार रहेको जिल्ला प्रहरी कार्यालय तनहुँले जनाएको छ । 

चाइना कम्युनिकेशन कन्ट्रक्सन प्रालिको रोलरबाट ११० लिटर डिजेल चोरी गरेको खुलेको प्रहरीको दाबी छ । 
डिजल चोरी गरी ग्यालिनमा राखेर हायलक्स गाडीमा लोड गर्दै गरेको अवस्थामा रंगेहात पक्राउ गरिएको प्रहरीले जनाएको छ । चोरीको डिजेल बोक्ने बा २० च ७४९ नम्बरको हायलक्स गाडीलाई नियन्त्रणमा लिइएको छ ।

आरोपीहरुलाई बिहीबार नै जिल्ला अदालतबाट म्याद लिएर अनुसन्धान भइरहेको प्रहरीले जनाएको छ ।