वीरगञ्ज बाल सुधार गृहबाट दुई कैदी फरार

१२ असोज, वीरगञ्ज । वीरगञ्जस्थित बाल सुधार गृहबाट दुई जना बालकैदी फरार भएका छन् । छतमाथिबाट हाम फालेर वीरगञ्ज – ४ बिर्तास्थित बाल सुधार गृहको दुई जना बालकैदी फरार भएका हुन् ।

जिल्ला प्रहरी कार्यालय पर्साका प्रवक्ता एवं प्रहरी नायव उपरीक्षक (डिएसपी) कुमार विक्रम थापाले बालकैदीहरू फरार भएको पुष्टि गरे । उनले भने, “आज बिहान उनीहरू छतमाथिबाट हाम फालेर फरार भएका हुन् । खोजी कार्य भइरहेको छ ।”

फरार भएका बालकैदीहरूको विषयमा उनले थप जानकारी दिन चाहेनन् । यद्यपि प्रहरी स्रोतका अनुसार फरार भएकाहरूमध्ये एक जना कर्तव्य ज्यान र अर्का कैदीलाई जबर्जस्ती करणी मुद्दामा बाल सुधार गृहमा ल्याइएको थियो । उनीहरूको खोजी कार्य तीव्र पारिएको डीएसपी थापाले बताए ।

भदौ २६ गते मात्रै भक्तपुर बाल सुधार गृहबाट वीरगञ्ज बाल सुधार गृहमा ल्याइएका बालकैदी र यहाँ पहिलैदेखि बस्दै आएकाहरू बीच झडप भएको थियो । झडप दुई जना प्रहरीसहित १३ जना घाइते समेत भएका थिए । झडप पश्चात् भक्तपुरको सुधार गृहबाट ल्याइएका कैदीहरूलाई अन्यत्र सारिएको थियो ।