नेपाली कांग्रेस कहाँ छ, गठबन्धन सरकारको काम र देशको अवस्थाप्रति सोचोस्ः अध्यक्ष ओली

१२ असोज, काठमाडौं । नेकपा एमालेका अध्यक्ष केपी शर्मा ओलीले नेपाली कांग्रेसले देशको गम्भीर अवस्थाप्रति ध्यान दिन नसकेको बताएका छन्  ।  उनले कांग्रेस सचेत र चिन्तित नबन्दा देशले दुःख पाइरहेको ओलीले बताएका छन्   । यो सरकार अझै कायम रहनु देशका लागि दुर्भाग्य भएको उनको भनाइ छ । 

शुक्रबार विराटनगरमा विमानस्थलमा सञ्चारकर्मीहरूसँग कुरा गर्दै उनले गठबन्धन सरकार नचलेको बताए । सरकार अपराधीको संरक्षकको रुपमा देखिएको भन्दै उनले यो सरकार रहनु देशका लागि दुर्भाग्य भएको बताए । सरकार गठबन्धनको छ, गठबन्धनमा कांग्रेस छ, कांग्रेस अहिलेको ठूलो दल हो तर, उनले देशका बारेमा सोचेन, यो दुःखद पक्ष हो, ओलीले भने ।   

उनले कांग्रेस कुन संसारमा छ भन्ने थाहा नभएका कारण सरकारमा अर्को विकल्प पनि नदेखिएको उनले बताए । सरकारमा हामी आफैं जान चाहिरहेका छैनौं । यो सरकार हटाउने हो भने अर्को उपयुक्त विकल्प हुने स्थिति कांग्रेसका कारण देखिँदैन भन्दै ओलीले अहिलेको सरकार भ्रष्ट र तस्करहरूको संरक्षक भएको बताए । 

प्रमुख पार्टीहरू जिम्मेवार हुँदा अर्को विकल्प हुने भएपनि कांग्रेसले यसबारे नसोचेको उनले बताए । एमाले अध्यक्ष ओलीले भने, ‘कांग्रेस कुन संसारमा छ भन्ने नै थाहा छैन । देशको अवस्थाप्रतिको गम्भीरता केही देखिन्न । कांग्रेसलाई गम्भीर बन्न म आग्रह गर्छु । ’

कोशी प्रदेश अधिवेशन उद्घाटन गर्न शुक्रबार विराटनगर पुगेका ओलीले प्रदेश अधिवेशनका क्रममा आफूले कसैलाई भोट दिन नभनेको दाबी गरे । ओलीले ‘केपी ओलीले भनेको कार्यकर्ताले मानेनन् भन्ने सन्देश दिन खोजिएको भन्दै असन्तुष्टि जनाए । केही सञ्चार माध्यम र विरोधीहरुले कार्यकर्ताको नाममा आफ्नो इच्छा थोपर्न खोजेको भन्दै उनले भने, ‘न मैले फलानालाई भोट दिनू, फलानालाई नदिनू भनेको छु, न कार्यकर्ताले नमानेको स्थिति छ ।’ आफूले सके सर्वसम्मति गर्नुस्, नसके स्वस्थ प्रतिस्पर्धा गर्नुस् मात्र भन्ने गरेको ओलीले बताएका छन् ।