दोलखाबाट ४ किलो सुनसहित पक्राउ परेका ५ जनाविरुद्ध संगठित अपराधमा अनुसन्धान

१२ असोज, काठमाडौं । बुधबार दोलखाको सिंगटीबाट ४ किलो सुन सहित पक्राउ गरिएका एक महिलासहित ५ जनाविरुद्ध प्रहरीले संगठित अपराध कसुरमा अुनसन्धान सुरु गरेको छ । 

जिल्ला अदालतबाट संगठित अपराधमा अनुसन्धान गर्न म्याद लिएको प्रहरीले जनाएको छ । पक्राउ पर्नेमा बिगु गाउँपालिका–१ बस्ने २८ वर्षीय केशर तामाङ, २० वर्षीय माधव मगर, १९ वर्षीय पेम्बा तामाङ, ५५ वर्षीय नुर्वु छिरिङ शेर्पा र ३० वर्षीया सुनमाला तामाङ रहेका छन् । ४ केजी सुन केशरको घरबाट बरामद गरिएको थियो ।

आरोपितहरू विरुद्ध भन्सार ऐन २०६४ तथा संगठित अपराध निवारण ऐन–२०७० विरुद्धको कसुरमा म्याद लिएर अनुसन्धान सुरु गरिएको दोलखा प्रहरीले जनाएको छ ।