बैतडीमा भिरबाट लडेर एक किशोरीको मृत्यु

 

१४ असोज, बैतडी । बैतडीमा भिरबाट लडेर एक किशोरीको मृत्यु भएको छ। जिल्लाको दोगडाकेदार  गाउँपालिका –१ गोरङकी अन्दाजी १८ बर्षिया सुमिता बिष्टको शनिबार भिरबाट लडेर मृत्यु भएको हो।

दिउँसो ५ बजे खर काट्ने क्रममा पिनेखोला भन्ने भिरबाट लडेर सुमिताको ज्यान गएको स्थानीयले बताएका छन्। भिरबाट लडेर घटनास्थलमै मृत्यु भएकी किशोरीको  घटनास्थलबाट शव घर ल्याउने काम भइरहेको स्थानीय भादेब बिष्टले जानकारी दिएका छन् । उनी श्रीपन्चदेव माध्यमिक विद्यालय रिममा कक्षा १२ मा अध्ययनरत बिद्यार्थी थिइन्  ।

बैतडीमा यति बेला हिउँदका समयमा बस्तुभाउलाई खुवाउन सुकाएर तयार गरिने घाँस अर्थात खर काट्ने काम सुरु भएको छ । विशेष गरी महिलाहरूलाई खर काटने चटारो भएको छ । प्रत्येक वर्ष असोज देखि कार्तिक महिना सम्म खर काट्ने गरिन्छ । वनपाखाँमा खर काट्ने क्रममा भीरबाट लडेर वर्षेनी कैयौँ महिलाको अकालमै ज्यान समेत जाने गरेको छ ।

वनपाखामा महिलाहरू नै बढि जसो घासँ काट्न जाने भएकाले उनीहरुको जीवन जोखिममा पर्ने गरेको छ । प्रत्येक वर्ष बैतडीमा खर काटने क्रममा भिरबाट खसेर एक दर्जन महिलाको अकालमै ज्यान जाने गरेको छ । कहिलेकाहीँ मात्रै घटना बारे प्रहरीलाई जानकारी दिने भएकाले प्रहरीको अभिलेखमा पनि कमै घटना दर्ता हुने गरेका छन् ।

ग्रामीण भेगमा बसोवास गर्नेहरुको मुख्य पेशा कृषि र पशुपालन हो । गाई वस्तुका लागी हिउँदमा  खासै घास नहुने हुदा खर काटेर भण्डारण गर्ने गरिन्छ । वनपाखामा खर वा घासँ काट्ने क्रममा भीरबाट खसेर हुन सक्ने सम्भावित दुर्घटनाबाट बच्ने उपाय तथा चेतना अभावमा महिलाहरुको अकालमै ज्यान जाने गरेको छ ।